Vaşinqtonun Meksikanın Sinaloa ştatının qubernatoru da daxil olmaqla 10 Meksika vətəndaşının ekstradisiya olunması tələbi və onlara qarşı irəli sürülən ittihamlar ABŞ-da qarşıdan gələn 2026-cı il seçkiləri ilə bağlıdır.

Musavat.com xəbər verir ki, bu açıqlama ilə Meksika prezidenti Klaudiya Şeynbaum Mexiko şəhərindəki Plaza de la Repubblica-da çıxış edib:

"Bu, qanuni bir sual doğurur: bu, ABŞ hökumətinin Meksikaya kömək etməkdə həqiqi, səmimi marağıdırmı? Bu, mütəşəkkil cinayətkarlıqla mübarizədə qanuni marağıdırmı? Yoxsa bəlkə də Amerikanın ifrat sağçılarının ölkəmizdən 2026-cı il seçkilərində mövqe qazanmaq üçün istifadə etdiyini görürük?"

Şeynbaum vurğulayıb ki, ABŞ Ədliyyə Nazirliyi narkotik kartelləri ilə əlaqədə ittiham olunan bir neçə meksikalı siyasətçinin günahkar olduqlarına dair dəlilləri ictimaiyyətə təqdim etmədən təcili olaraq ekstradisiyasını tələb edib. Onun sözlərinə görə, bu miqyasda bir hadisə ikitərəfli münasibətlər tarixində tamamilə görünməyib və xaricdən məsul şəxslərə qarşı barmaqla işarə etmək cəhdləri ölkənin işlərinə qəbuledilməz müdaxilədir.

Qeyd edək ki, Mexiko ilə Vaşinqton arasındakı münasibətlər 19 apreldə iki Amerika agentinin Meksika ərazisində rəsmi icazə olmadan işləyərkən öldürüldüyü bildirildikdən sonra daha da pisləşib. Həmin vaxt Meksika Baş Prokurorluğu və Çihuahua Dövlət Prokurorluğunun iki rəhbəri də narkotik laboratoriyasında keçirilən əməliyyat zamanı həlak olub. Meksika Baş Prokurorluğu xarici rəsmilər tərəfindən Meksika qanunlarının pozulması iddiaları ilə bağlı araşdırmaya başlayıb.

Qısa müddət sonra ABŞ bir neçə siyasətçinin saxlanılması və ekstradisiyası üçün təcili sorğu göndərib. Onların arasında ABŞ tərəfinin mütəşəkkil cinayətkarlıq və narkotik kartelləri ilə əlaqədə ittiham etdiyi Sinaloa qubernatoru Ruben Roça Moya da var idi.

Musavat.com