Rusiyada müharibənin dayandırılması mövqeyi ilə seçkilərə qatılmağa çalışan “Yabloko”nun seçki kampaniyasının taleyi bu gün Ali Məhkəmədə həll olunur. Partiyanın apellyasiya şikayətinə hakim Vladimir Zaytsevin sədrliyi ilə hakimlər kollegiyası baxacaq. Araşdırmaçılar Zaytsevin əmlakını, gəlirlərini və əvvəlki siyasi əhəmiyyətli işlərdə oynadığı rolu araşdırıblar.

Musavat.com xəbər verir ki, Zaytsev Moskvada, Julebino qoruğunun yaxınlığındakı Privolnaya küçəsində 104 kvadratmetrlik mənzilə sahibdir.

2020-ci ildə onun Ali Məhkəmədə aylıq maaşı 600 min rubldan çox olub. Hakim 2022-ci il istehsalı Volkswagen Touareg avtomobilindən istifadə edir. Belə avtomobilin qiymətinin 5-10,5 milyon rubl arasında olduğu, yuxarı həddə götürüldükdə bunun hakimin təxminən iki illik maaşı ilə müqayisə oluna biləcəyi bildirilir.

Maraqlıdır ki, Zaytsevin “Yabloko” ilə qarşılaşması ilk dəfə deyil. 2003-cü il Dövlət Duması seçkilərinin nəticələri ilə bağlı məhkəmə prosesində partiyanın vəkili Vladimir Suvorov hakimin işdən kənarlaşdırılmasını tələb etmişdi. “Yabloko” Zaytsevin vəsatətlərə münasibətdə qərəzli davrandığını iddia edib. Lakin etiraz təmin olunmayıb

Zaytsevin adı Rusiyada son illərin bir sıra mühüm siyasi məhkəmə proseslərində də keçir.

2018-ci ildə o, Aleksey Navalnının prezident seçkilərinə buraxılmaması ilə bağlı Mərkəzi Seçki Komissiyasının qərarından verilmiş şikayətə baxan kollegiyanın üzvü və məruzəçi hakim olub. Ali Məhkəmə MSK-nın qərarını qüvvədə saxlayıb.

Navalnının ölümündən sonra, 2024-cü ildə Zaytsev onun cəzaçəkmə müəssisələrində ŞİZO və PKT-də saxlanılma qaydalarına dair başqa bir şikayətinə baxılmasına sədrlik edib. Bu tələb də təmin edilməyib.

Hakimin adı “Memorial” və “Novaya qazeta” ilə bağlı proseslərdə də keçir. 2022-ci ildə Zaytsev beynəlxalq “Memorial” təşkilatının ləğvinə dair apellyasiya prosesində məruzəçi hakim olub və ləğvetmə qərarı dəyişdirilməyib. Elə həmin il “Novaya qazeta”nın fəaliyyətinin dayandırılması barədə qərardan verilən apellyasiya şikayətində də məruzəçi olub. Şikayət rədd edilib.

Zaytsev hazırda Avropa İttifaqının sanksiyaları altındadır. Aİ onu 22 mart 2024-cü ildə insan hüquqlarının pozulmasına görə tətbiq edilən qlobal sanksiya rejimi çərçivəsində siyahıya daxil edib. Buna əsaslardan biri kimi onun 2018-ci ildə Navalnının prezident seçkilərinə buraxılmaması ilə nəticələnən qərarda iştirakı göstərilib.

Beləliklə, “Yabloko” üçün həlledici məhkəmə iclasına partiyanın 20 ildən artıq əvvəl də qərəzlilikdə ittiham etdiyi, Navalnıdan “Memorial” və “Novaya qazeta”ya qədər bir sıra siyasi əhəmiyyətli işlərdə iştirak etmiş hakim sədrlik edir.

Musavat.com