Onlayn ictimai-siyasi qəzet
Cəbhədə böyük dəyiş-düyüş: Ukrayna 1000, Rusiya isə 35 hərbçisinin meyitini təhvil aldı
Rusiya və Ukrayna arasında hərbi əməliyyatların davam etdiyi bir vaxtda, tərəflər həlak olan hərbçilərin nəşlərinin qarşılıqlı qaytarılması istiqamətində növbəti iri həcmli əməliyyatı həyata keçiriblər.
Musavat.com xəbər verir ki, bu barədə məlumatı Rusiya nümayəndə heyətinin rəhbəri Vladimir Medinski açıqlayıb.
Medinskinin sözlərinə görə, keçirilən mübadilə prosesi nəticəsində Ukrayna tərəfinə 1000 nəfər həlak olmuş ukraynalı hərbçinin nəşi təhvil verilib. Rusiya tərəfi isə qarşılığında 35 rusiyalı hərbçinin cənazəsini qəbul edib. Mübadilənin harada və hansı şəraitdə keçirildiyi barədə təhlükəsizlik səbəbindən ətraflı məlumat verilməyib.
Bu, müharibənin gedişində baş tutan ən böyük meyit mübadilələrindən biri kimi qiymətləndirilir. Adətən belə əməliyyatlar Beynəlxalq Qırmızı Xaç Komitəsinin vasitəçiliyi və hər iki tərəfin hərbi idarələrinin razılığı ilə həyata keçirilir. Həlak olanların şəxsiyyətinin müəyyənləşdirilməsi üçün yaxın vaxtlarda DNT analizlərinin aparılacağı gözlənilir.
Ukrayna tərəfi hələlik rəqəmlərlə bağlı rəsmi bəyanat yaymasa da, humanitar qərargahlar itkin düşmüş hərbçilərin ailələrinə məlumatların verilməsi prosesinə başlayıblar. Ekspertlər qeyd edirlər ki, rəqəmlər arasındakı bu dərəcədə böyük fərq (1000-in 35-ə) son vaxtlar Pokrovsk və digər istiqamətlərdə gedən qanlı döyüşlərin intensivliyi və tərəflərin itkiləri barədə müəyyən təsəvvür yaradır.
Qeyd edək ki, fevral ayı ərzində tərəflər arasında hərbi əsirlərin mübadiləsi istiqamətində də danışıqların davam etdiyi bildirilir.
Musavat.com
XƏBƏR LENTİ
05 Iyun 2026
04 Iyun 2026
ŞƏRHLƏRŞƏRH YAZ