Onlayn ictimai-siyasi qəzet
Rusiya yeni səfərbərlikdən çəkinir
Rusiya hakimiyyəti Ukraynadakı müharibədə böyük itkiləri kompensasiya etmək üçün yeni kütləvi səfərbərlik elan etmək əvəzinə, daha çox kişini müqaviləli hərbi xidmətə cəlb etməyə çalışır. Regionlarda bunun üçün getdikcə daha sərt üsullardan istifadə edildiyi bildirilir.
Musavat.com xəbər verir ki, bu barədə “The Guardian” yazıb.
Qəzetin məlumatına görə, Rusiya ordusunun ölən və yaralananlar daxil olmaqla aylıq itkiləri 30 min nəfəri keçir. Almaniya Beynəlxalq və Təhlükəsizlik Məsələləri İnstitutunun eksperti Yanis Kluge hesab edir ki, Moskva hazırda gündə təxminən 1000 yeni hərbçi cəlb edir.
Ekspertin fikrincə, bu rəqəmlər yeni cəlb olunanların böyük hissəsinin ordunun hücum imkanlarını genişləndirməyə deyil, itkilər nəticəsində şəxsi heyəti azalmış bölmələri komplektləşdirməyə sərf edildiyini göstərir.
Bununla yanaşı, Rusiyada yaxın zamanda yeni kütləvi səfərbərlik keçiriləcəyinə dair məlumatlar yüksək vəzifəli rəsmilər tərəfindən təkzib edilir. Moskvadakı müzakirələrdən məlumatlı iki mənbə də Vladimir Putinin yeni səfərbərlik əmri vermək qərarına gəldiyinə dair heç bir əlamət olmadığını bildirib. “The Guardian”a danışan yüksək vəzifəli Qərb rəsmisi də eyni qənaəti bölüşüb.
Qəzetin Kreml rəhbərliyinin mövqeyindən məlumatlı mənbələrinə görə, hakimiyyət hazırda yeni səfərbərliyin siyasi və sosial risklərinə getməkdənsə, daha çox kişini müqavilə imzalamağa məcbur və ya təşviq etmək xəttini seçib.
Yay aylarında hüquqşünaslar və fəallar Rusiyanın bir sıra regionlarında müqaviləli xidmətə cəlbetmənin getdikcə daha məcburi xarakter alan üsullarını qeydə alıblar. Bildirilir ki, bəzi kişilər polis tərəfindən küçədə saxlanılıb, digərləri iş yerlərindən aparılıb və ya polis bölmələrinə çağırılıb. Daha sonra onların hərbi xidmətə qəbul məntəqələrinə aparılaraq müqavilə imzalamağa məcbur edildiyi iddia olunur.
Yeni hərbçilərin tapılması ilə bağlı məsuliyyətin əhəmiyyətli hissəsi Rusiya regionlarının üzərinə qoyulub. Qubernatorlardan və yerli administrasiyalardan Moskvanın müəyyən etdiyi müqaviləli hərbçi toplama planlarını yerinə yetirmək tələb olunur. Bu sistem Kremlə yeni ümumi səfərbərlik elan etmədən ordunun şəxsi heyətini artırmağa imkan verməlidir.
Regionlarda maliyyə stimulları da genişləndirilib. Yerli hakimiyyətlər müqavilə imzalayaraq orduya gedənlərə minlərlə dollar ekvivalentində ödənişlər təklif etməklə yanaşı, yeni əsgər tapan və onu müqavilə bağlamağa razı salan şəxslərə də pul ödəyirlər.
“The Guardian”ın təsvir etdiyi mənzərəyə görə, Moskvanın qarşısında əsas problem sadəcə yeni əsgərlər toplamaq deyil: hazırkı qəbul tempi böyük itkilərin yerini doldurmağa sərf olunur. Buna görə də Kreml yeni səfərbərliyin risklərini üzərinə götürmədən müqaviləli xidmət sistemindən maksimum istifadə etməyə çalışır.
Musavat.com
XƏBƏR LENTİ
18 Avqust 2026
ŞƏRHLƏRŞƏRH YAZ