Onlayn ictimai-siyasi qəzet
Rusiyada benzin böhranı: Putin günahı öz hökumətini üstünə atdı
Rusiyada yanacaq böhranı genişlənməkdə davam edir. Ölkənin böyük hissəsində benzin satışı ilə bağlı məhdudiyyət və fasilələr qeydə alındığı halda, Prezident Vladimir Putin yaranmış vəziyyəti insanlar üçün müəyyən “narahatlıq” kimi qiymətləndirərək problemin həllinə görə hökuməti məsul göstərib.
Musavat.com xarici mediaya istinadən xəbər verir ki, Putin bu barədə jurnalist Pavel Zarubinə müsahibəsində danışıb.
Rusiya prezidenti yanacaq bazarında problemlərin olduğunu etiraf etsə də, məsələ ilə Baş nazir Mixail Mişustinin rəhbərlik etdiyi hökumətin məşğul olduğunu vurğulayıb.
“Bəli, hələ bütün məsələlər həll olunmayıb, amma həll edilir. Xüsusi komissiya yaradılıb”, – Putin bildirib.
Prezident ölkənin yanacaqdoldurma məntəqələrinin 70 faizdən çoxuna təsir etdiyi bildirilən benzin çatışmazlığını böyük böhran kimi təqdim etməyib:
“Bəli, əlbəttə, insanlar üçün müəyyən narahatlıqlar var, amma hökumət bunu nəzarətdə saxlamalıdır”.
Bundan əvvəl Rusiya baş nazirinin müavini Aleksandr Novak da ölkənin yanacaq bazarında “gərginliyin ikinci mərhələsinin” yaşandığını təsdiqləmişdi.
BenZinMap portalının avqustun 23-nə olan məlumatına görə, Rusiyanın 85 regionundan 63-də benzinin satışına qoyulan məhdudiyyətlər qüvvədə qalır. Daha 19 regionda lokal yanacaq çatışmazlığı və ya qiymət artımı qeydə alınır.
Böhranın yeni mərhələsi Ukraynanın Rusiya neft emalı zavodlarına zərbələrinin intensivləşməsi fonunda başlayıb. Avqustun ilk yarısında ümumi illik emal gücü 145 milyon ton olan ən azı doqquz neft emalı zavodu hücuma məruz qalıb. Onlardan ən azı dördünün fəaliyyətini dayandırdığı bildirilir.
Rystad Energy-nin hesablamalarına görə, hazırda Rusiyada neft emalının həcmi mövsümi normadan təxminən üçdəbir aşağıdır.
Beləliklə, Rusiyanın əksər regionlarında yanacaq satışında problemlər davam etdiyi və bir sıra neft emalı zavodlarının fəaliyyəti dayandığı halda, Putin böhranı “müəyyən narahatlıq” səviyyəsində qiymətləndirərək problemin həllini Mişustin hökumətinin üzərinə qoyub.
Musavat.com
XƏBƏR LENTİ
24 Avqust 2026
04:30 Sərhəddə saatlarla gözləyən TIR-larla bağlı mühüm qərar – Gürcüstan qaydaları kökündən dəyişdi
23 Avqust 2026
ŞƏRHLƏRŞƏRH YAZ