Onlayn ictimai-siyasi qəzet
Tiflisdə qalmaqallı final – azərbaycanlı cüdoçuya qarşı ədalətsizlik iddiaları var
Gürcüstanın paytaxtı Tifıis şəhərində keçirilən Avropa çempionatı qalmaqallı hakim qərarları ilə yadda qalır. Turnirin ikinci günündə Azərbaycan millisinin üzvü Hidayət Heydərov final qarşılaşmasında mübahisəli qərarlarla üzləşib.
Musavat.com-un müxtəlif idman mənbələrinə istinadən verdiyi xəbərə görə, Hidayət Heydərovun finalda rəqibi gürcü cüdoçu Laşa Şavdatuaşvili olub. Görüşün gedişində hakimlərin qərarları xüsusilə diqqət çəkib. Əsas vaxtın sonlarına yaxın azərbaycanlı idmançıya heç bir ciddi səbəb olmadan ikinci “şido” (cərimə xəbərdarlığı) verildiyi bildirilir.
Qaydalara əsasən, cüdoçunun üç “şido” alması onun məğlubiyyəti ilə nəticələnir. Əlavə vaxt – “golden score” zamanı isə vəziyyət daha da gərginləşib. Altıncı dəqiqədə verilən üçüncü “şido” Heydərovun məğlubiyyəti ilə nəticələnib və qələbə Şavdatuaşviliyə verilib.
Qeyd edək ki, bu, yarışda ilk belə hal deyil. Bir gün əvvəl də digər azərbaycanlı cüdoçu Balabəy Ağayev yarımfinalda gürcü idmançı Giorgi Sardalaşvili ilə görüşdə oxşar mübahisəli hakim qərarları ilə üzləşmişdi. İdman ictimaiyyətində səslənən fikirlərə görə, bu cür qərarlar yarışın obyektivliyinə ciddi kölgə salır və hakimlik institutuna inamı sarsıdır. Rəsmi qurumların isə məsələ ilə bağlı hansı mövqe tutacağı hələlik məlum deyil.
Hadisə bir daha göstərir ki, beynəlxalq yarışlarda təkcə fiziki hazırlıq deyil, həm də ədalətli hakimlik idmanın taleyini müəyyən edən əsas amillərdən biridir.
E.Məmmədəliyev,
Musavat.com
XƏBƏR LENTİ
07 Iyun 2026
06 Iyun 2026
ŞƏRHLƏRŞƏRH YAZ