Onlayn ictimai-siyasi qəzet
Yaxın Şərqdə dəhşətli eskalasiya: Hüsilər neft obyektlərini VURDU, böyük yanğınlar başladı
Yəmən hüsiləri Səudiyyə Ərəbistanının strateji infrastruktur obyektlərinə qarşı iki yeni iri miqyaslı zərbə endirdiklərini bəyan ediblər.
Musavat.com xəbər verir ki, qruplaşmanın yaydığı məlumata görə, "Saudi Aramco" şirkətinin Yanbu şəhərindəki neft obyektləri "onlarla ballistik raket və dronlarla" atəşə tutulub, nəticədə ərazidə böyük yanğınlar və ciddi dağıntılar baş verib. Eyni zamanda, Xamis-Muşayt şəhərində yerləşən aviabazaya da ballistik raketlərlə zərbələr endirilib.
Hüsilər bu hücumların Səudiyyə Ərəbistanı koalisiyasının son bir həftə ərzində Yəmən ərazisinə endirdiyi 450-dən çox hava zərbəsinə cavab xarakteri daşıdığını bildiriblər.
Yanbu limanındakı neft obyektlərinə hücum xəbəri qlobal enerji bazarı üçün xüsusilə kritik əhəmiyyət kəsb edir. Həmin porta neft ötürən əsas kəmərin fəaliyyəti sentyabrın 10-da endirilən dron zərbələrindən sonra artıq dayandırılmışdı və "Saudi Aramco" Avropaya göndəriləcək tədarükləri təxirə salırdı. Neft terminalı və emalı obyektlərinin birbaşa zədələnməsi qlobal yanacaq təchizatındakı kəsintiləri daha da kəskinləşdirə bilər. Hələlik dəymiş ziyanın miqyası barədə müstəqil mənbələr tərəfindən rəsmi təsdiq verilməyib.
Hüsi nümayəndələri Səudiyyə Ərəbistanının dərinliklərinə zərbələri davam etdirəcəklərini vurğulayaraq "blokadaya cavab blokada, eskalasiyaya cavab eskalasiya" prinsipinə sadiq qalacaqlarını bəyan ediblər.
Musavat.com
XƏBƏR LENTİ
15 Oktyabr 2026
ŞƏRHLƏRŞƏRH YAZ