Onlayn ictimai-siyasi qəzet
5 il danışmayan Alzheimer xəstəsində ŞOK dəyişiklik: Alimlər HEYRƏTƏ GƏLDİ
Alzheimer xəstəliyindən əziyyət çəkən və son 5 il ərzində, demək olar ki, heç danışmayan yaşlı qadında tətbiq edilən psilosibin (xalq arasında “sehrli göbələk” kimi tanınan maddə) terapiyasından sonra diqqətçəkən dəyişikliklər müşahidə olunub.
Musavat.com xəbər verir ki, Frontiers in Neuroscience elmi jurnalında dərc olunan hadisə analizinə görə, 80 yaşlarında olan qadın 10 ildən artıqdır Alzheimer xəstəliyi ilə yaşayıb. Xəstəliyin irəliləməsi nəticəsində o, danışmaq, emosional reaksiya vermək və ailə üzvləri ilə ünsiyyət qurmaq qabiliyyətini böyük ölçüdə itirib.
Həkimlərin nəzarəti altında aparılan eksperimental müalicə zamanı qadına psilosibin tərkibli “sehrli göbələk” terapiyası tətbiq edilib. Müalicədən sonra qadının uzun illərdən sonra yenidən danışmağa başladığı, ailəsi ilə xatirələrini bölüşdüyü və ətrafdakılarla daha fəal ünsiyyət qurduğu bildirilib.
Araşdırma müəlliflərinin sözlərinə görə, qadında göz təması qurmaq, gülümsəmək və emosional reaksiyalar vermək kimi qabiliyyətlərdə də müvəqqəti yaxşılaşma qeydə alınıb. Hətta bəzi gündəlik fəaliyyətləri daha müstəqil şəkildə yerinə yetirdiyi müşahidə olunub.
Bununla belə, alimlər vurğulayırlar ki, əldə edilən nəticələr yalnız bir xəstə üzərində aparılmış müşahidəyə əsaslanır və bunu Alzheimer xəstəliyinin müalicəsi kimi qiymətləndirmək düzgün deyil. Müşahidə olunan yaxşılaşmaların daimi olmadığı qeyd olunur.
Mütəxəssislər hesab edirlər ki, psilosibin tərkibli “sehrli göbələklər”in beyin fəaliyyətinə təsiri gələcəkdə Alzheimer və digər nevroloji xəstəliklərin araşdırılmasında yeni imkanlar aça bilər. Lakin bu istiqamətdə genişmiqyaslı klinik tədqiqatların aparılmasına ehtiyac var.
Hazırda psilosibin terapiyası bir sıra ölkələrdə depressiya və digər psixi pozuntularla bağlı eksperimental araşdırmalarda öyrənilsə də, Alzheimer xəstəliyinin standart müalicə üsulu hesab edilmir.
Musavat.com
XƏBƏR LENTİ
09 Iyun 2026
ŞƏRHLƏRŞƏRH YAZ