Onlayn ictimai-siyasi qəzet
BP əksər payını bu şirkətə satır
BP şirkəti özünün sürtkü yağları bölməsindəki ("Castrol") əksər payını ABŞ investisiya şirkəti "Stonepeak"ə satır.
Musavat.com xəbər verir ki, müvafiq razılaşma barədə məlumatı BP açıqlayıb.
Məlumata görə, şirkət borc da daxil olmaqla, "Castrol"un 65 faizini ümumi biznes dəyəri 10,1 milyard dollar olmaqla satacaq.
Sövdələşmə BP-yə təxminən 6 milyard dollar xalis gəlir, o cümlədən şirkətin "Castrol"dakı saxlanılan 35 faiz payı üzrə 800 milyon dollar əvvəlcədən dividend ödənişi təmin edəcək.
Tərəflər əməliyyatı 2026-cı ilin sonuna qədər başa çatdırmağı planlaşdırırlar. BP iki illik lokaut dövründən sonra "Castrol"dakı qalan payını sata biləcək.
Sövdələşmə BP tərəfindən 2025-ci ilin fevral ayında elan edilən 20 milyard dollarlıq aktiv satışı planının bir hissəsidir. Mətbuat açıqlamasına görə, bu günə qədər bu plan çərçivəsində tamamlanmış və ya elan edilmiş əməliyyatların ümumi dəyəri təxminən 11 milyard dollardır.
"Castrol"dakı payın satışından əldə edilən bütün gəlir BP-nin borcunu azaltmaq üçün istifadə olunacaq. Şirkətin üçüncü rübün sonunda borcu 26,1 milyard dollar təşkil edib.
BP 2025-ci ilin fevral ayının sonunda "Castrol"u satmaq planlarını açıqlayıb. Biznesi əldə etməkdə "Saudi Aramco", "Reliance Industries Ltd.", "Apollo Global Management", "Lone Star Funds", "Brookfield Asset Management" və digər şirkətlər maraqlarını ifadə ediblər.
Qeyd edək ki, "Castrol" avtomobil, aviasiya, dəniz, dəmir yolu nəqliyyatı və sənaye sektorları üçün yüksək keyfiyyətli yağlar və texniki mayelər istehsal edir. Brendin məhsulları dünyanın 150-dən çox ölkəsində mövcuddur.
İdarəetməsində 80 milyard dollardan çox aktivi olan "Stonepeak" infrastruktur layihələrinə yönəlmiş dünyanın ən böyük müstəqil investorlarından biridir. İnvestisiya şirkəti ABŞ-da və digər ölkələrdə boru kəməri aktivlərində və LNG ixrac layihələrində əhəmiyyətli paylara malikdir.
Musavat.com
XƏBƏR LENTİ
04 Iyun 2026
ŞƏRHLƏRŞƏRH YAZ