Onlayn ictimai-siyasi qəzet
ABŞ-də respublikaçılar arasında çat
Vaşinqtonda hakim Respublikaçılar Partiyası daxilində gərginlik açıq qarşıdurmaya çevrilir.
Musavat.com xəbər verir ki, “Politico” saytında dərc olunan təhlildə Nümayəndələr Palatasının spikeri Mayk Consona partiya daxilində dəstəyin sürətlə azaldığı yazılıb.
Məqalədə qeyd olunur ki, Conson çətin siyasi həftədən (“hell week”) sonra bir sıra mühüm qanun layihələrini qəbul etdirə bilsə də, bu, ciddi narazılıqlar bahasına başa gəlib. Respublikaçılar bildirir ki, onun son anda ziddiyyətli vədlər verməsi artıq etimadı sarsıdır.
Konqres üzvü Maks Miller açıq şəkildə bəyan edib ki, növbəti Konqresdə Consonun liderliyini dəstəkləməyəcək:
“Bu adam bizi gülümsəyərək parçalayır”.
Məqalədə təsvir olunur ki, son günlər Nümayəndələr Palatasında vəziyyət o həddə çatıb ki, bəzi respublikaçılar qapalı iclaslarda və hətta zalda Consona qarşı qışqırıb, sərt ifadələr işlədiblər.
Qalmaqalın mərkəzində etanol yanacağı ilə bağlı qanun layihəsi dayanır. Conson əvvəlcə bir qrup respublikaçıya bu məsələ ilə bağlı söz versə də, daha sonra geri addım atıb. Bu isə xüsusilə Konqres üzvü Enn Vaqnerin sərt reaksiyasına səbəb olub. Digər tərəfdən, ultra-mühafizəkar qanadı təmsil edən Çip Roy da Consonu sözündən dönməkdə ittiham edib.
Məqalədə vurğulanır ki, bu gərginlik yalnız bir epizod deyil - son aylarda Respublikaçılar Partiyası daxilində ardıcıl böhranlar yaşanır. Bu isə partiyanın noyabr seçkilərində çoxluğunu qoruyub saxlaya bilməsi ilə bağlı narahatlıqları artırır.
Eyni zamanda bəzi respublikaçılar artıq alternativ lider axtarışına başlayıb. Buna baxmayaraq, Conson hələ də partiyanın əsas fiquru olan Donald Trampın dəstəyini saxlayır.
Demokratlar isə bu vəziyyəti açıq şəkildə tənqid edir. Konqres üzvü Don Beyer bildirib ki, belə xaos əvvəlki spikerlər dövründə mümkün olmazdı.
Bununla belə, Conson özü iddiaları rədd edib:
“Bunlar sadəcə saxta xəbərlərdir. Heç kim deyə bilməz ki, mən sözümü pozmuşam”.
Məqalənin yekununda qeyd olunur ki, qarşıdakı həftələr Conson üçün həlledici olacaq və Respublikaçılar Partiyası daxilində parçalanma daha da dərinləşə bilər.
Musavat.com
XƏBƏR LENTİ
14 Iyun 2026
13 Iyun 2026
ŞƏRHLƏRŞƏRH YAZ