Onlayn ictimai-siyasi qəzet
ABŞ Hörmüz boğazında gizli ixrac marşrutu yaradıb
ABŞ gizli şəkildə Hörmüz boğazından milyonlarla barel neft ixrac etmək üçün gəmiçilik dəhlizi yaradıb.
Musavat.com xarici mediaya istinadla xəbər verir ki, “Axios”a görə, boğazdan gündə təxminən 10 milyon barel neft ixrac olunur - bu, müharibədən əvvəlki həcmin təxminən yarısıdır.
“Axios” bildirir ki, ABŞ ordusu gündəlik milyonlarla barel neft daşımaq üçün Hörmüz boğazında gizli şəkildə gəmiçilik dəhlizi yaradıb.
"Artıq iki aydır ki, Hörmüz boğazının cənub kanalına nəzarət edirik. İslam İnqilabı Keşikçiləri Korpusu (SEPAH) narahatedici ola bilər, amma onlar boğaza nəzarət etmirlər. Biz nəzarət edirik", - deyə bir mənbə nəşrə bildirib.
“Axios”un mənbələrinə görə, əməliyyatın bir hissəsi olaraq, hər gecə Oman sahili boyunca cənub kanalından boğaza 15-20 tanker daxil olur və çıxır. Boğazdan gündəlik təxminən 10 milyon barel neft ixrac olunur və qlobal enerji bazarına daxil olur. Nəşrin məlumatına görə, bu, müharibədən əvvəlki həcmin təxminən yarısıdır.
Hörmüz boğazındakı əməliyyata nəzarət edən xüsusi qrup Şimali Karolina ştatının Fort Braqq şəhərindəki ordu qərargahında yerləşir. O, öz hərəkətlərini Fars körfəzindəki regional tərəfdaşlarla əlaqələndirir.
Hörmüz boğazı vasitəsilə Fars körfəzindən çıxan gəmilərin siyahısı hər gün tərtib edilir, eləcə də Ərəbistan dənizindən boğazdan keçərək körfəz limanlarına neft götürmək üçün gedən boş tankerlərin siyahısı hazırlanır. Gəmilər ABŞ hərbi hava qüvvələrinin qırıcı təyyarələri tərəfindən qorunan müəyyən bir vaxt intervalında vahid növbədə hərəkət edirlər.
Mənbələrə görə, əməliyyat ABŞ Mərkəzi Komandanlığının bu yaxınlarda iki həftəlik hərbi kampaniyası nəticəsində mümkün olub və bu kampaniya zamanı İran radarları və dəniz müşahidə sistemləri sıradan çıxarılıb.
Nəşrin mənbələrinə görə, İranın Hörmüz boğazının cənub kanalını izləməsi hazırda İran hakimiyyətinin bərpa edə bildiyi bir neçə radarla, eləcə də SEPAH-ın kiçik, yüksək sürətli qayıqlarındakı "müşahidəçilərlə" məhdudlaşıb.
İran fevral ayında ABŞ ilə müharibənin başlanğıcından bəri Hörmüz boğazını blokadada saxlayır. Vaşinqton daha sonra İran limanlarına dəniz blokadası tətbiq edib. Boğaz dünya neftinin 15-20%-ni və mayeləşdirilmiş təbii qazın 30%-dən çoxunu idarə edir.
Musavat.com
XƏBƏR LENTİ
23 Avqust 2026
ŞƏRHLƏRŞƏRH YAZ