Onlayn ictimai-siyasi qəzet
Baş nazirin dissertasiyası plagiat çıxdı?
Litvanın baş naziri Mindauqas Sinkeviçyusun doktorluq dissertasiyası ilə bağlı plagiat iddiaları rəsmi araşdırma predmetinə çevrilib.
Musavat.com xəbər verir ki, Litvanın Menecment və İqtisadiyyat Universiteti baş nazir Sinkeviçyusun akademik etikaya mümkün riayət etməməsi ilə bağlı araşdırmaya başlayıb.
Universitetin Akademik Etika Komitəsi Akademik Etika və Prosedurlar üzrə Ombudsman İdarəsinin göndərdiyi şikayətə baxılması barədə qərar qəbul edib. Şikayətdə baş nazirin doktorluq dissertasiyasının hazırlanması zamanı mümkün akademik pozuntuların olduğu iddia edilir.
Universitet bəyan edib ki, tələbələr və məzunlarla bağlı akademik etika məsələləri şəxsin tutduğu vəzifədən və ya ictimai statusundan asılı olmayaraq hamı üçün eyni qaydalar əsasında araşdırılır.
Toplanmış materiallar öyrənildikdən və bütün maraqlı tərəflər dinlənildikdən sonra yekun qərar veriləcək. Qüvvədə olan qaydalara əsasən, yay tətili müddəti nəzərə alınmadan araşdırma 30 təqvim günü ərzində başa çatdırılmalıdır. Universitet yoxlamanın nəticələrini sentyabrın sonuna qədər açıqlamağı planlaşdırır.
Baş nazirin doktorluq dissertasiyasında mümkün plagiatla bağlı müzakirələr son həftələr ictimaiyyətin və siyasi müxalifətin tənqidlərindən sonra daha da güclənib.
Mindauqas Sinkeviçyus isə dissertasiyasının akademik normalara tam uyğun hazırlandığını bildirib və plagiat ittihamlarını dəfələrlə rədd edib.
Qeyd edək ki, Sinkeviçyus 2009-cu ildə Menecment və İqtisadiyyat Universitetində marketinq və menecment üzrə magistr dərəcəsi alıb, 2015-ci ildə isə həmin universitetdə doktorluq dissertasiyasını müdafiə edib.
Musavat.com
XƏBƏR LENTİ
14 Avqust 2026
ŞƏRHLƏRŞƏRH YAZ