Onlayn ictimai-siyasi qəzet
Boş qalan evlər üçün PUL PAYLAMAĞA başladılar: Köçənlərə minlərlə dollar veriləcək
ABŞ-ın Minnesota ştatında yerləşən Harmony qəsəbəsi əhali azalmasının qarşısını almaq və boş qalan torpaq sahələrini yenidən yaşayışa açmaq üçün diqqətçəkən proqram başladıb.
Musavat.com xəbər verir ki, qəsəbəyə köçərək yeni ev tikmək istəyən şəxslərə minlərlə dollar maliyyə dəstəyi veriləcəyi açıqlanıb.
Təxminən 1000 nəfər əhalisi olan Harmony uzun illərdir kiçik Amerika qəsəbələrinin yaşadığı əsas problemlərlə — gənclərin böyük şəhərlərə köçməsi və boş qalan yaşayış sahələrinin artması ilə mübarizə aparır. Yerli idarəetmə isə bu problemi həll etmək üçün yeni təşviq proqramını işə salıb.
Layihəyə əsasən, qəsəbədə yeni ev tikəcək şəxslərə 20 min dollara qədər maliyyə yardımı ediləcək. Dəstəyin məbləği tikilən evin ölçüsü və yerləşdiyi əraziyə görə dəyişir.
Rəsmilər bildirirlər ki, proqramın əsas məqsədi həm boş torpaq sahələrini dəyərləndirmək, həm də bölgəyə yeni ailələri cəlb etməkdir. Layihənin yalnız yaşayış məqsədi daşımadığı, eyni zamanda yerli iqtisadiyyatı canlandırmağı hədəflədiyi vurğulanır.
Harmony rəhbərliyi xüsusilə sakit həyat tərzi axtaran ailələrin və uzaqdan işləyən şəxslərin bölgəyə maraq göstərə biləcəyini düşünür. Qəsəbədə yaşayış xərclərinin böyük şəhərlərlə müqayisədə daha aşağı olduğu qeyd edilir.
Son illərdə ABŞ-da bir çox kiçik şəhər və qəsəbə əhali itkisini azaltmaq üçün oxşar təşviq proqramlarına başlayıb. Bəzi bölgələr yeni sakinlərə pulsuz torpaq, bəziləri isə birbaşa pul dəstəyi təklif edir.
Mütəxəssislər hesab edir ki, pandemiyadan sonra uzaqdan işləmə imkanlarının artması kiçik yaşayış məntəqələrinə marağı gücləndirib və bu tip proqramların daha da yayılmasına səbəb ola bilər.
Musavat.com
XƏBƏR LENTİ
04 Iyun 2026
ŞƏRHLƏRŞƏRH YAZ