Onlayn ictimai-siyasi qəzet
Moskvaya ayaq öpməyə gedibmiş - ilginc açıqlama
Deputat Sahib Alıyev Ermənistanda artıq başa çatmaq üzrə olan seçki kampaniyasında öz ölkələrindən çox, Azərbaycanın adının çəkilməsinə və azərbaycanlılara yanaşmada səsləndirilən bəzi açıqlamalara münasibət bildirib.
Musavat.com-un məlumatına görə, o bildirib ki, bu seçkinin necə bitəcəyinə ən çox təsir göstərən nə kimlərinsə hibrid müdaxiləsi, nə də bu hibrid müdaxilənin qarşısını almağa çalışanların Nikol Paşinyana açıq dəstəyidir: “7 iyun seçkisinin gündəliyini olduğu kimi, nəticəsini də müəyyənləşdirəcək bir nömrəli faktor cənab Prezidentin təbirincə desək, bütün ssenarilərə hazır olan güclü Azərbaycandır. Ona görə də seçki kampaniyası boyu rəqibləri Paşinyanı Azərbaycanın diktəsi ilə hərəkət etməkdə, o isə qarşı tərəfi ölkəni yeni savaşa sürükləmək və beləliklə, xəritədən silinmək təhlükəsi ilə üz-üzə qoymaqda suçlandırırdı. Və burada istər-istəməz sual yaranır: əgər Azərbaycan Ermənistandan qat-qat güclü olmasaydı, bizimlə sülh gündəliyini populist Paşinyan özünün əsas seçki platformasına çevirərdimi? Və elektoratı rəqibləri hakimiyyətə gələcəyi təqdirdə yenidən savaşın başlayacağıyla qorxudardımı?”
S.Alıyev bildirib ki, o, bu sualı təsadüfən səsləndirmir: “Azərbaycandilli virtual mühitdə Nikol Paşinyanın tökülən qanları görüb ayılması və məhz bundan sonra bizimlə düşmənçiliyin onlara lazım gəlmədiyini anlaması haqda açıqlamalarının, eləcə də parlamentin sədri Alen Simonyanın təqribən eyni məzmunlu fikirlərinin necə böyük həvəslə təqdir edildiyini və artıq hər şeyin arxada qaldığı təəssüratı yarandığını, yaxud da yaradıldığını görürəm. Yəni qarşıdakının kimliyi unudulur. Elə son açıqlamasında Alen Simonyan bildirir ki, o, ikinci Qarabağ savaşı zamanı Azərbaycanın qarşısını kəssinlər deyə, Moskvaya ayaq öpməyə gedibmiş. Bu ayaq öpmək onun öz sözüdür, mənim deyil. Yaxşı, birdən o, ayaq öpməyə getdiyi yerdəkilər 90-cı illərin əvvəlindəki kimi onların yerinə vuruşmağa razı olsaydılar necə, Paşinyanla Simonyanın bizə yanaşmaları Köçəryanla Karapetyanınkından çoxmu fərqlənəcəkdi? Paşinyan həmin Köçəryanla Karapetyanı Ermənistandan deportasiya olunan azərbaycanlıların yurdlarına qayıdış məsələsini siyasi gündəmə çıxarmaqda ittiham edir. Bu baxımdan o, düz 600 il azərbaycanlılara qarşı etnik təmizləmə həyata keçirmək arzusu ilə yaşadıqlarını etiraf edən keçmiş ustadı, nasist Levon Ter-Petrosyanı təkrarlamırmı?
Ümumiyyətlə, məqsədə çatmaq üçün ayaq öpməyi özlərinə rəva bilənlər və bunu utanmadan dilə gətirənlər Azərbaycanla sülhə əlacsızlıqdan yaranan bir zərurət, həm də müvəqqəti bir zərurət kimi baxmırlarsa, əlaltından niyə silahlanır və münaqişənin ilk qurbanlarının öz yurdlarına dönüşünə nədən bu qədər qarşı çıxırlar?”
E.Paşasoy,
Musavat.com
XƏBƏR LENTİ
05 Iyun 2026
ŞƏRHLƏRŞƏRH YAZ