Onlayn ictimai-siyasi qəzet
Pokrovsk uğrunda həlledici döyüş – Rus qoşunlarının şəhərə daxil olması VİDEOsu yayıldı
Musavat.com xəbər verir ki, sosial şəbəkələrdə yayılan yeni görüntülər Rusiya qoşunlarının Donetsk vilayətində yerləşən Pokrovsk istiqamətində irəlilədiyini göstərir. Kadrlarda rus hərbçilərinin E50 şossesi boyunca cənub-şərqdən şəhər kənarına doğru hərəkəti əks olunur. Şiddətli duman və ağır relyef döyüş əməliyyatlarını çətinləşdirir, hərəkəti yavaşıdır.
Buna baxmayaraq, Pokrovsk hazırda tam şəkildə Rusiyanın nəzarətinə keçməyib. Döyüşlərin əsas hissəsi şəhərin cənub-şərq və cənub-qərb istiqamətlərində, yaşayış massivləri və sənaye zonalarında gedir. Şəhərin mərkəzi, inzibati binalar və əsas logistik qovşaqlar hələlik Ukrayna Silahlı Qüvvələrinin nəzarəti altındadır. Rusiya tərəfi şəhərin qismən mühasirəsini gücləndirərək E50 və T0504 yollarını nəzarətə götürməyə çalışır.
Pokrovsk Donbas cəbhəsində Ukrayna ordusunun mühüm logistika mərkəzi sayılır. Şəhər Slavyansk–Kramatorsk müdafiə xətti ilə quru əlaqəni təmin edir, sursat və yanacaq təchizatında aparıcı rol oynayır. Ekspertlərin fikrincə, Pokrovskun tam itirilməsi Ukrayna müdafiə xəttinin daha qərbə – Konstantinovka və Drujkivka istiqamətinə çəkilməsinə gətirib çıxara bilər.
Ukrayna Baş Qərargahı bildirir ki, Pokrovsk istiqamətində vəziyyət kritik olaraq qalır və şəhərin müdafiəsinə əlavə bölmələr cəlb olunub. Müdafiə xəttinin dərinləşdirilməsi və bölgədə minalanma əməliyyatlarının genişləndirilməsi davam edir. Artilleriya duelləri və yaxın məsafəli piyada döyüşləri intensiv xarakter alıb.
Bölgədə hava şəraiti də əməliyyatların gedişinə təsir göstərir. Musavat.com bildirir ki, duman və torpaq yumşalması ağır texnikanın hərəkətini məhdudlaşdırır, döyüşləri əsasən piyada qruplarının təmas xəttində aparılan qarşıdurmalar səviyyəsinə endirir.
Pokrovsk istiqamətində döyüşlərin yaxın günlərdə daha da kəskinləşəcəyi gözlənilir. Şəhərin taleyi tərəflərin əlavə ehtiyat qüvvələrə çıxış imkanları və komanda qərarlarının sürəti ilə müəyyən olunacaq.
Musavat.com
XƏBƏR LENTİ
31 Avqust 2026
ŞƏRHLƏRŞƏRH YAZ