Onlayn ictimai-siyasi qəzet
TikTok süni intellektlə işləyən hesabları hədəfə alır
TikTok siyasi proseslər, cari hadisələr, maliyyə və tibbi mövzularda kütləvi şəkildə süni intellekt məzmunu yayan hesabları müəyyənləşdirmək üçün yeni sistemləri sınaqdan keçirir.
Musavat.com xəbər verir ki, platformanın yaydığı rəsmi açıqlamada süni intellektdən istifadə edərək eyni tipli videolar hazırlayan və onları böyük sürətlə paylaşan hesabların xüsusi nəzarətə götürüldüyü bildirilib.
TikTok vurğulayıb ki, məqsəd süni intellektdən normal yaradıcı istifadəni məhdudlaşdırmaq deyil. Yeni sistemlər orijinal müəllifləri kölgədə qoyan, ictimai etimada və insanların sağlamlığına, yaxud maliyyə qərarlarına təsir göstərə bilən kütləvi spam şəbəkələrini aşkarlamağa yönəlib.
Şirkətin məlumatına görə, 2026-cı ilin ilk üç ayında platformadan 86 milyondan çox saxta hesab silinib. Lakin bu rəqəm yalnız süni intellekt hesablarına deyil, ümumilikdə müəyyənləşdirilən saxta hesablara aiddir.
TikTok indiyədək üç milyarddan çox videonu süni intellekt vasitəsilə hazırlanmış və ya ciddi şəkildə dəyişdirilmiş material kimi işarələyib. Bunun üçün müəlliflərin qoyduğu etiketlərdən, görünməz rəqəmsal nişanlardan və videonun mənşəyini göstərən “Content Credentials” texnologiyasından istifadə olunur.
Platforma rəqəmsal materialın harada və hansı vasitələrlə yaradıldığını müəyyənləşdirən açıq C2PA standartının rəhbər komitəsinə də qoşulub. C2PA TikTok-un komitəyə üzvlüyünü iyulun 27-də açıqlayıb.
Yeni siyasət avtomatik səslə oxunan hər bir xəbərin və ya süni intellektlə montaj edilən videonun silinəcəyi demək deyil. Əsas risk eyni şablonla yüzlərlə video hazırlayan, müəllifi və mənbəsi bəlli olmayan, yoxlanılmamış xəbərləri kütləvi şəkildə yayan hesablarla bağlıdır.
Dəyişiklik Azərbaycan xəbər səhifələrinə də təsir göstərə bilər. Süni aparıcı, avtomatik səs və şablon görüntülərlə fasiləsiz xəbər paylaşan hesabların spam kimi qiymətləndirilməsi ehtimalı artır. Buna görə media qurumları videolarda orijinal çəkilişə, real jurnalist təqdimatına, ilkin mənbənin göstərilməsinə və süni intellektdən istifadə olunubsa, bunun açıq etiketlənməsinə üstünlük verməli olacaqlar.
Musavat.com
XƏBƏR LENTİ
12 Oktyabr 2026
11 Oktyabr 2026
ŞƏRHLƏRŞƏRH YAZ