Onlayn ictimai-siyasi qəzet
Moskvada gərgin saatlar: Simonyan Lavrovun qarşısında Ermənistanın "cavabsız suallarını" masaya qoydu
5 fevral 2026-cı il tarixində Moskvada Ermənistan Milli Assambleyasının spikeri Alen Simonyan və Rusiya Xarici İşlər naziri Sergey Lavrov arasında son illərin ən gərgin diplomatik dialoqlarından biri baş tutub.
Musavat.com xəbər verir ki, Lavrovun Ermənistanın "şimaldan gələn mifik təhlükə" iddialarına qarşı verdiyi sərt reaksiyadan sonra, Alen Simonyan rəsmi İrəvanın Moskvaya olan etirazlarını açıq şəkildə ifadə edib. Spiker bildirib ki, Ermənistanın xüsusilə Kollektiv Təhlükəsizlik Müqaviləsi Təşkilatı (KTMT) ilə bağlı dəfələrlə səsləndirdiyi fundamental suallar hələ də cavabsız qalmaqdadır.
"Bizim çox sayda sualımız var ki, onlara indiyə qədər cavab almamışıq. Bu suallar dəfələrlə ən yüksək səviyyədə dilə gətirilib", — deyə Simonyan vurğulayıb. Bununla belə, o, Ermənistanın Rusiya ilə iqtisadi bağları tamamilə qoparmaq niyyətində olmadığını da qeyd edib. Simonyan Avrasiya İqtisadi Birliyi (Aİİ) və Gömrük İttifaqından çıxmağın hazırda gündəmdə olmadığını bildirərək, hər iki tərəf üçün faydalı olacaq ortaq həll yollarının tapılmasının vacibliyinə toxunub.
Görüşün ən diqqətçəkən məqamı Simonyanın Rusiyaya verdiyi "təhlükəsizlik zəmanəti" mesajı olub. O, Ermənistanın Rusiyaya qarşı heç bir düşmənçilik planı qurmadığını və İrəvanda belə bir yanaşmanın heç vaxt olmayacağını iddia edib. Lakin bu diplomatik sığorta cəhdinə baxmayaraq, Simonyanın Moskvaya səfəri ərəfəsində verdiyi digər bəyanatda ABŞ-ın təşəbbüsü olan "Tramp marşrutu" (TRIPP) layihəsində Rusiyanın iştirakını "absurd" adlandırması, iki ölkə arasındakı etimad böhranının nə dərəcədə dərin olduğunu göstərir. Lavrov isə cavabında Ermənistanın müttəfiqlik öhdəliklərini yerinə yetirmək əvəzinə Qərbin "təhlükəsizlik nağıllarına" inanmasının region üçün riskli olduğunu bir daha xatırladıb.
Musavat.com
XƏBƏR LENTİ
05 Iyun 2026
04 Iyun 2026
ŞƏRHLƏRŞƏRH YAZ