Onlayn ictimai-siyasi qəzet
Qaluzindən İrəvana xəbərdarlıq: Eyni vaxtda iki stulda oturmaq olmaz!
Ermənistan bizim müttəfiqimiz və strateji tərəfdaşımızdır və münasibətlərimizin bu əsas parametrləri dəyişmir.
Musavat.com xəbər verir ki, bu barədə Rusiya Xarici İşlər Nazirliyi başçısının müavini Mixail Qaluzin “İzvestiya” qəzetinə müsahibəsində bildirib.
“Biz münasibətlərimizin məhz bu xarakterindən çıxış edirik. Ermənistanın istənilən ölkə və birliklə, o cümlədən Avropa İttifaqı ilə münasibətlər qurmaq hüququna gəlincə, hesab edirik ki, bu, hər bir suveren dövlətin hüququdur. Lakin bir məsələ əməkdaşlıqdır, başqa bir məsələ isə inteqrasiyadır. Ermənistanla Avropa İttifaqı arasında formalaşmaqda olan yeni strateji tərəfdaşlıq gündəliyində bizim gördüyümüz isə məhz inteqrasiyadır. Bu inteqrasiya siyasət, təhlükəsizlik, iqtisadiyyat, energetika, ekologiya və digər əsas sahələrdə Ermənistanın normativ-hüquqi bazasının Avropa İttifaqının standartları ilə uyğunlaşdırılmasını nəzərdə tutur.
Biz erməni həmkarlarımıza açıq və səmimi şəkildə bildiririk ki, normativ-hüquqi bazanın Aİ standartları ilə uyğunlaşdırılması qaçılmaz olaraq Ermənistanın üzvü olduğu Avrasiya İqtisadi İttifaqının normaları ilə ziddiyyət təşkil edəcək. Bu səbəbdən biz Ermənistanın hüquqi bazasını Avropa İttifaqı normaları ilə uyğunlaşdırmaq kursu ilə Aİİ qaydaları arasında yarana biləcək ziddiyyətləri diqqətlə izləyirik.
Bu mövzuları biz müvafiq formatlarda, o cümlədən ikitərəfli iqtisadi əməkdaşlıq üzrə hökumətlərarası komissiya çərçivəsində açıq və səmimi şəkildə müzakirə edirik. Həmin komissiyanın son iclası 17 dekabr tarixində İrəvanda keçirilib.
Eyni zamanda məmnunluqla qeyd etdik ki, Ermənistanın baş naziri Nikol Paşinyan dekabr ayında həm 11 dekabrda Moskvada keçirilən Avrasiya Hökumətlərarası Şurasının iclasında, həm də 21 dekabrda Sankt-Peterburqda keçirilən Ali Avrasiya İqtisadi Şurasının iclasında iştirak edib və Ermənistanın Avrasiya inteqrasiya prosesində iştirakını davam etdirmək niyyətini təsdiqləyib. Ümid edirik ki, bu, belə də davam edəcək. Xüsusilə nəzərə alsaq ki, Ermənistan 2015-ci ildən Avrasiya İqtisadi İttifaqının üzvüdür və əminik ki, bu 10 il ərzində Ermənistan cəmiyyəti və ölkə rəhbərliyi Aİİ üzvlüyünün verdiyi ciddi üstünlükləri hiss edib”, – deyə Qaluzin vurğulayıb.
Onun sözlərinə görə, Ermənistan Avrasiya İqtisadi İttifaqında iştirakdan real fayda əldə edir və erməni tərəfi Moskvanın arqumentlərini anlayışla qarşılayır.
Musavat.com
XƏBƏR LENTİ
07 Iyun 2026
06 Iyun 2026
ŞƏRHLƏRŞƏRH YAZ