İnsanlara hürriyət, millətlərə istiqlal!

Yeni həbslər: sülh müqaviləsinin yolu təmizlənir? – Moskva pusquda, Bakı isə...

Ən yaxşı müdafiə hücumdur. Belə görünür ki, Ermənistan Baş naziri Nikol Paşinyan həm öz hakimiyyətini qorumaq, həm də sülh müqaviləsinin yolunu təmizləmək üçün yaxınlaşan seçkilərədək Rusiyaya bağlı radikal-revanşist müxalifətə və kilsəyə, eləcə də “5-ci kolona” qarşı məhz belə bir taktikanı tərcih edəcək. Bu da təzə fakt.

Ölkənin Korrupsiyaya Qarşı Mübarizə Komitəsi bu gün Gümrü meri Vardan Quksaytna da daxil, 8 nəfərin həbsini əks etdirən video yayımlayıb. Onlar külli miqdarda rüşvət almaq və verməkdə təqsirləndirilirlər. Ötən həftə bir qrup din xadiminin həbsinin ardınca bu, növbəti hay-küylü tutuqlanma sayıla bilər...

Məsələ ondadır ki, Qukasyan Rusiyaya bağlı müxalifətin odioz təmsilçisi sayılır. Gümrüdəki son mer seçkilərində hakim “Mülki Müqavilə” partiyası qalib gəlsə də, 50%-lik üstünlüyə malik olmadığı üçün müxalifət fraksiyaları birləşərək onu mer postuna gətirmişdilər. Hətta eyni modelin qarşıdakı parlament seçkilərində təkrarlana biləcəyinə və Paşinyanı seçki yolu ilə hakimiyyətdən salacaqlarına ümidli idilər. Daha dəqiqi, ümidlidirlər.

Amma sən saydığını say, gör Paşinayan nə sayır. Baş nazir bununla əslində bir neçə “dovşan” vurmuş olur. Əvvəla, seçkilər ərəfəsi radikal müxalifətin rüşvətxor-korrupsioner imicini gücləndirməklə onun olan-qalan nüfuzunu da puç edir. İkinci yandan, keçmiş xunta rejiminin hər hansı formada bərpasının nə dərəcədə təhlükəli olduğunu bir daha ictimai rəyə aşılayır...

Bu, əlbəttə Azərbaycanın da maraqlarına da uyğundur. Çünki bizə sülh prosesini tamamlamaq və iki xalq arasında konflikt səhifəsini həmişəlik qapatmaq lazımdır. Bu isə yalnız Nikol Paşinyan komandası ilə mümkündür. Kremlə bağlı radikal-revanşistlər prosesə maksimum əngəl olmağa çalışacaqlar.

Səbəb bəlli: iki qonşu arasında münaqişə bitəndən və sülh müqaviləsi imzalanandan, ardınca Türkiyə- Ermənistan münasibətləri normallaşandan sonra Rusiyanın həmin o Gümrüdəki hərbi bazasına, sərhəddə “FSB” hərbçilərinə, bütövlükdə Ermənistandakı mövcudluğuna lüzum qalmayacaq. Odur ki, hamı tələsir - həm hakimiyyət və onun “rəngarəng” opponentləri, həm də təbii ki, Rusiya...

Azərbaycan isə Paşinyan hökuməti ilə deyil, Ermənistanla, erməni xalqı ilə sülh müqaviləsi imzalamaq niyyətindədir. Yəni bütün zamanlar və hakimiyyətlər üçün hüquqi qüvvəsini saxlayacaq bir sənəddən söhbət gedir. Bakı konstitusiya məsələsində məhz bu səbəbə israr və prinsipiallıq göstərir. Yoxsa avqustun 8-də Ağ Evdə sülh müqaviləsi imzalana da bilərdi.

Rusiyaya gəlincə, şəkk-şübhə yox ki, rəsmi Moskva əlindən gələni edəcək ki, Ermənistandakı seçkilərdə hakim partiya qalib gəlməsin. Yaxud qələbə qazansa belə, parlamentdə 50%-lik üstünlüyə malik olmasın. Bu, dinc variantdır. “B planı” da istisna deyil. Sui-qəsd variantını deyirik...

Əlbəttə, artıq 8 ildir hakimiyyətdə olan Paşinyan riskləri ciddiyə almaya bilməz. Ona da şübhə yox ki, Qərb, özəlliklə də onun lokomotivi ABŞ təhlükəsizliklə bağlı Ermənistan hökumətini zəruri kəşfiyyat məlumatları ilə təmin edir və edəcək. Xüsusən də Ağ Evdə Tramnla birgə məlum sənədlərin imzalanmasından sonra.

Unutmayaq, İrəvandakı Amerika səfirliyi əməkdaşların sayına görə, MDV-də ən böyük, dünyada isə ikinci böyük diplomatik nümayəndəlikdir. Bu da təsadüfi deyil ki, Qərbin insan haqları təşkilatları Paşinyanın içəri atdırdığı şəxslərlə bağlı (Rusiyalı oliqarx-milyarder Samvel Karapetyan, din xadimləri və s.) indiyədək ciddi etiraz bildirməyib.

Nəhayət, erməni cəmiyyəti əgər 44 günlük müharibədən sonra keçirilən (2021) parlament seçkilərində Paşinyan partiyasını qalib edibsə, niyə də daha bir dəfə ona mandat verib qonşularla barışıq prosesinin yekunlaşmasını təmin eləməsin? 2021-də sülh istəyən bir xalq, 2026-da, qüvvələr balansının tam dəqiqləşdiyi vaxtda müharibə partiyasınamı səs verəcək? Bu ki intihar olar(dı)...

Zahid SƏFƏROĞLU

ŞƏRHLƏRŞƏRH YAZ

Şərh yoxdur

ƏLAQƏLİ XƏBƏRLƏR

26.08.2026 672

Uşaqların azalmağında nəqliyyatın və artistlərin rolu barədə
26.08.2026 452

Əbədiliyin mədəniyyət kodu
26.08.2026 1690

Rusun ermənidən geri almaq istədiyi “HƏDİYYƏLƏR” – Biri də Qərbi ZƏNGƏZUR...

YAZARIN DİGƏR YAZILARI

25 Avqust 2026

21 Avqust 2026

17 Avqust 2026

14 Avqust 2026

12 Avqust 2026

07 Avqust 2026

05 Avqust 2026

31 Iyul 2026

29 Iyul 2026

25 Iyul 2026

21 Iyul 2026

17 Iyul 2026

15 Iyul 2026

11 Iyul 2026

10 Iyul 2026

06 Iyul 2026

04 Iyul 2026

01 Iyul 2026

30 Iyun 2026

24 Iyun 2026

19 Iyun 2026

10 Iyun 2026

08 Iyun 2026

06 Iyun 2026

02 Iyun 2026

30 May 2026

26 May 2026

23 May 2026

20 May 2026

18 May 2026