Onlayn ictimai-siyasi qəzet
Bakının göydələnləri, yoxsa başımızın üstündən asılan "Gilyotin"? - FOTOLAR
Paytaxt Bakı sürətlə böyüyür, addımbaşı yeni çoxmərtəbəli binalar ucalır. Lakin bu müasirləşmə mənzərəsinin arxasında illərdir həllini tapmayan, insan həyatını hər an təhlükə altına atan böyük bir laqeydlik dayanır: tikintilərdə təhlükəsizlik qaydalarının kobud şəkildə pozulması.
Son ünvanlardan biri Nərimanov rayonu, Əhmədbəy Ağaoğlu küçəsi 35-47 ünvanının üzbəüzündə ucaldılan 19-20 mərtəbəli yaşayış binasıdır. Binanın ən üst mərtəbəsində tikinti üçün quraşdırılan ağır taxta konstruksiyalar heç bir təhlükəsizlik toru və ya qoruyucu çərçivə olmadan, sözün əsl mənasında asılı vəziyyətdə qalıb. Günbəgün küləyin və yükün təsiri ilə hərəkət edən bu taxta parçaları hər an aşağıda hərəkət edən piyadaların, sıx nəqliyyat axınının üzərinə düşə bilər.
Məsələ ilə bağlı əməkdaşımız tikintini aparan məsul şəxslərlə əlaqə saxlayaraq təhlükəni xatırlatsa da, qarşı tərəf problemi həll etmək əvəzinə reallıqdan uzaq və demaqoq arqumentlərlə məsuliyyətdən yayınmağa çalışıb.
Təəssüf ki, bu, Bakı üçün istisna hal deyil. Şəhərin müxtəlif yerlərində tikilən binalardan yoldan keçən vətəndaşların başına, park edilmiş maşınların üstünə taxta, dəmir, daş və ya armatur parçalarının düşməsi xəbərlərinə tez-tez rast gəlirik. Bir çox hallarda bu "laqeydlik tullantıları" avtomobilləri yararsız hala salır, daha da dəhşətlisi - dinc insanların ağır xəsarət alması və ya həyatını itirməsi ilə nəticələnir.
Hadisə baş verəndən sonra isə tikinti şirkətləri standart bəhanələrə əl atırlar: "Külək güclü idi", "Gözlənilməz texniki xəta oldu". Lakin sual olunur: İnsan həyatı hesabına ucaldılan bu mərtəbələr hansı standartlara cavab verir?
Normativlərə əsasən, çoxmərtəbəli binaların tikintisi zamanı: Ərazinin ətrafı mütləq mühafizə çəpərləri ilə əhatələnməli, yuxarı mərtəbələrdən əşyaların düşməsinin qarşısını alan xüsusi təhlükəsizlik torları çəkilməli, piyadalar üçün qoruyucu örtüklü keçidlər (tunellər) təşkil olunmalıdır.
Əhmədbəy Ağaoğlu küçəsindəki mənzərə isə göstərir ki, bəzi tikinti şirkətləri üçün insan amili və vətəndaşın təhlükəsizliyi qazanılacaq mənfəətdən çox geridə gəlir. Aidiyyəti qurumların operativ müdaxiləsi və ciddi sanksiyaları olmasa, növbəti faciənin baş verməsi an məsələsidir.
Bir daha xatırladırıq, tikinti sahəsindəki laqeydlik bədbəxt hadisə deyil, cinayətdir!
Şahanə Rəhimli
Musavat.com
XƏBƏR LENTİ
07 Sentyabr 2026
06 Sentyabr 2026
ŞƏRHLƏRŞƏRH YAZ