Onlayn ictimai-siyasi qəzet
Blokada illəri geridə qalır - Azərbaycan coğrafiyasını gücə çevirir
Prezident İlham Əliyevin Naxçıvana səfəri muxtar respublikanın sosial-iqtisadi inkişafı ilə yanaşı, Azərbaycanın gələcək regional strategiyası baxımından da mühüm mesajlarla yadda qaldı. Səfər çərçivəsində həyata keçirilən layihələr və qarşıya qoyulan hədəflər Naxçıvanın yeni mərhələdə Azərbaycanın nəqliyyat, iqtisadi və geosiyasi imkanlarında daha böyük rol oynayacağını göstərir. Xüsusilə Zəngəzur dəhlizi fonunda Naxçıvanın strateji əhəmiyyəti daha da artır.
Bu səfər muxtar respublikanın gələcəyinə nə vəd edir? Naxçıvan Türk dünyasına açılan mühüm tranzit qapıya çevrilə biləcəkmi?
"Prezident İlham Əliyevin Naxçıvana son səfəri göstərdi ki, muxtar respublikanın qarşısında Azərbaycanın regional mövqeyini gücləndirən daha geniş strateji vəzifələr dayanır. Naxçıvanın yeni inkişaf modeli onun coğrafi mövqeyinin yaratdığı imkanların iqtisadi və siyasi üstünlüklərə çevrilməsi üzərində qurulur".
Bu sözləri Musavat.com-a Milli Məclisin deputatı Elnarə Akimova deyib.
O diqqətə çatdırıb ki, 44 günlük Vətən müharibəsində qazanılan Zəfər və 2023-cü ildə Azərbaycanın ərazi bütövlüyü ilə suverenliyinin tam bərpası bu baxımdan Naxçıvan üçün də yeni mərhələ açdı:
"Uzun illər blokada şəraitində yaşayan muxtar respublika indi Türkiyə ilə birbaşa əlaqələri, İranla sərhədi və gələcəkdə Zəngəzur istiqamətində formalaşacaq bağlantıları sayəsində regional tranzit sisteminin mühüm həlqəsinə çevrilmək imkanına malikdir. Səfər zamanı nəqliyyat, enerji, sənaye, sosial infrastruktur və müdafiə sahələrində görülən işlər də vahid strategiyanın tərkib hissəsidir. Məqsəd Naxçıvanı sadəcə inkişaf edən bir regiona deyil, Azərbaycanın iqtisadi təhlükəsizliyinə, logistika imkanlarına və regional bağlantılarına töhfə verən strateji mərkəzə çevirməkdir. Bu mənzərədə Zəngəzur dəhlizinin xüsusi əhəmiyyəti var. Onun reallaşması Naxçıvanın Azərbaycanın əsas hissəsi ilə nəqliyyat əlaqələrini əhəmiyyətli dərəcədə gücləndirməklə yanaşı, Türkiyədən Azərbaycan üzərindən Mərkəzi Asiyaya və daha sonra Çinə uzanan marşrutların imkanlarını genişləndirə bilər. Beləliklə, Naxçıvan coğrafi baxımdan kənarda qalmış ərazi olmaqdan çıxaraq Şərqlə Qərb arasında hərəkətin mühüm qovşaqlarından birinə çevrilə bilər. Bu, həm də Azərbaycanın regional iqtisadi çəkisinin artması deməkdir. Çünki müasir dünyada nəqliyyat dəhlizlərinə nəzarət yalnız yük daşımalarının artması deyil, investisiya, ticarət, enerji və siyasi təsir imkanlarının genişlənməsi anlamına gəlir".
Deputat vurğulayıb ki, Naxçıvanın bu sistemə daha sıx inteqrasiyası Azərbaycanın Türk dünyası ilə əlaqələrini də yeni səviyyəyə yüksəldə bilər:
"Enerji istiqamətində görülən işlər də eyni strategiyanın başqa bir mühüm tərəfidir. Xüsusilə yaşıl enerji potensialının inkişaf etdirilməsi Naxçıvanın gələcəkdə həm öz enerji tələbatını təmin edən, həm də Azərbaycanın ümumi enerji sisteminə töhfə verən regionlardan birinə çevrilməsi üçün imkan yaradır. Bu isə iqtisadi inkişafla yanaşı, enerji təhlükəsizliyinin möhkəmləndirilməsi baxımından da əhəmiyyətlidir. Səfərin müdafiə və təhlükəsizlik istiqaməti də xüsusi mesaj daşıyır. Naxçıvana döyüş bayrağının təqdim olunması Azərbaycanın bu strateji bölgənin təhlükəsizliyinə verdiyi əhəmiyyətin göstəricisidir. Yəni iqtisadi açılım və nəqliyyat layihələri təhlükəsizlik amilindən ayrı düşünülmür. Əksinə, güclü təhlükəsizlik mühiti Naxçıvanın iqtisadi və tranzit potensialının tam reallaşmasının əsas şərtlərindən biridir. Prezidentin səfəri ilə ortaya qoyulan mənzərə ondan ibarətdir ki, Naxçıvanın gələcəyi artıq blokada və təcrid anlayışları ilə deyil, bağlantı, tranzit, istehsal, enerji və regional əməkdaşlıq anlayışları ilə ifadə olunacaq. Bu dəyişiklik təkcə muxtar respublikanın deyil, Azərbaycanın bütövlükdə geosiyasi və geoiqtisadi çəkisinin artması deməkdir. Ən mühüm məsələ isə budur: Azərbaycan öz coğrafiyasını siyasi iradə və böyük infrastruktur layihələri vasitəsilə strateji üstünlüyə çevirir. Naxçıvan bu strategiyanın ən mühüm dayaqlarından biridir. Zəngəzur bağlantısının perspektivləri ilə birlikdə bu qədim Azərbaycan torpağı Türk dünyasını birləşdirən yolların üzərində daha mühüm mövqe qazana, Azərbaycanı isə Şərqlə Qərb arasında etibarlı və əvəzolunmaz nəqliyyat-logistika tərəfdaşlarından birinə çevirə bilər".
Cavanşir Abbaslı
Musavat.com
XƏBƏR LENTİ
17 Avqust 2026
ŞƏRHLƏRŞƏRH YAZ