Onlayn ictimai-siyasi qəzet
Dünyada milyarderlərin sayı partladı – 29 nəfərin əlində 4,1 trilyon dollar!
Dünyada milyarderlərin sayı və onların sərvəti indiyədək görünməmiş həddə çatıb. Xüsusilə süni intellekt bumunun varlıların sərvətinin daha sürətlə artmasına ciddi təsir göstərdiyi bildirilir.
Musavat.com xarici agentliklərə istinadən xəbər verir ki, bu barədə “Altrata” şirkətinin “Billionaire Census 2026” araşdırmasında məlumat verilib.
Hesabata görə, 2025-ci ildə dünyada milyarderlərin sayı 8,2 faiz artaraq rekord həddə – 3795 nəfərə çatıb. Bu, son beş ilin ən yüksək artım tempidir. Son on ildə isə milyarderlərin sayı təxminən 60 faiz çoxalıb.
Onların ümumi sərvəti daha sürətlə böyüyüb – cəmi bir ildə 12,8 faiz artaraq 15,1 trilyon dollara çatıb. Bu məbləğ S&P 500 indeksinə daxil olan şirkətlərin ümumi bazar dəyərinin təxminən dörddə birinə bərabərdir.
Araşdırmada sərvət artımının mühüm səbəblərindən biri kimi süni intellektə investisiya bumu göstərilir. Milyarderlərin sərvətinə ən böyük təsir göstərən 150 açıq şirkət arasında süni intellektə fəal sərmayə yatıranların kapitallaşması 2024–2025-ci illərdə bu sahəyə ciddi investisiya qoymayan şirkətlərlə müqayisədə orta hesabla 23 faiz daha çox artıb.
Diqqətçəkən başqa məqam nəhəng sərvətlərin getdikcə daha az insanın əlində cəmləşməsidir. Dünyanın hər birinin sərvəti 50 milyard dolları ötən cəmi 29 ən zəngin insanının əlində 4,1 trilyon dollar var. Bu, bütün dünya milyarderlərinin sərvətinin 27 faizidir.
Milyarderlərin əsas məkanı yenə ABŞ-dır. Ölkədə onların sayı bir ildə 11,5 faiz artaraq 1265 nəfərə çatıb. Şimali Amerikada ümumilikdə 1337, Avropada 1081, Asiyada isə 881 milyarder yaşayır. Çin milyarderlərinin sayı 13 faiz artsa da, onların sayı ABŞ-dakından üç dəfədən də azdır. Avropanın aparıcı ölkələri arasında ən sürətli artım Almaniyada qeydə alınıb – 20 faiz.
Araşdırma milyarderlərin portretinə dair maraqlı rəqəmlər də ortaya çıxarıb. Onların orta yaşı 71-dir, cəmi 13 faizi qadındır. Milyarderlərin təxminən 15 faizinin şəxsi təyyarəsi var, lüks yaxtaya sahib olanların sayı isə bundan təxminən üç dəfə azdır.
Maraqlıdır ki, milyarderlərin böyük əksəriyyəti sərvətini özünün yaratdığı bildirilən şəxslərdir. Sərvətini tam şəkildə miras alanların payı cəmi 8 faizdir. Milyarderlər arasında ən geniş təmsil olunan sahə isə bank və maliyyə sektorudur.
Qarşıdakı onillikdə dünyanın ən böyük sərvət transferlərindən birinin baş verəcəyi gözlənilir. Təxminən 6,6 trilyon dolların milyarderlərin həyat yoldaşları və övladlarına keçəcəyi proqnozlaşdırılır. Potensial varislərin sayı 5 minə yaxındır.
Musavat.com
XƏBƏR LENTİ
28 Avqust 2026
ŞƏRHLƏRŞƏRH YAZ