Onlayn ictimai-siyasi qəzet
Epşteyn işi: yetkinlik yaşına çatmayan qızlar, məşhurların gizli eşq macəraları
"Mən cinsi yırtıcı deyiləm, cinayətkaram. Bu, qatil ilə bir tikə çörək oğurlayan arasındakı fərqdir".
Musavat.com xəbər verir ki, 2011-ci ildə Cefri Epşteyn "New York Post" qəzetinə verdiyi müsahibədə belə demişdi.
O, yetkinlik yaşına çatmayan qızları cinsi məqsədlər üçün istifadə etməyə dair geniş bir şəbəkə yaratmaqda ittiham olunurdu.
İttihamlara baxmayaraq, Epşteyn onları ardıcıl olaraq rədd edirdi. Epşteynin şirkəti 1 milyard ABŞ dollarından çox müştəri aktivlərini idarə edirdi. Qısa müddətdə uğur qazanan Cefri Epşteyn sərvətini genişləndirməyə başladı: Floridada malikanə, Nyu-Meksikoda ranço, Nyu-Yorkda isə iddialara görə, şəhərin ən böyük şəxsi evini almışdı.
O, məşhurlar, sənətçilər və siyasətçilərlə yaxın münasibət qurmuşdu. 2002-ci ildə ABŞ prezidenti Donald Tramp Epşteyn haqqında belə demişdi:
"Mən Cefrini 15 ildir tanıyıram. O, möhtəşəm oğlandır. Onun yanında olmaq çox əyləncəlidir. Hətta deyilənə görə, o da mənim qədər gözəl qadınlarla maraqlanır və onların çoxu nisbətən gəncdir".
Nyu-Yorkda doğulub böyüyən Epşteyn 1970-ci illərdə özəl Dalton məktəbində riyaziyyat və fizika dərsləri verirdi. O, öz bacarıqları sayəsində "Wall Street"dəki "Bear Stearns" investisiya bankında ortaqlıq qazandı və 1982-ci ildə "J. Epstein & Associates" firmasını yaratdı.
Epşteynin dost dairəsində ABŞ-nin keçmiş prezidenti Bill Klinton, məşhur aktyorlar Kevin Speysi və Kris Taker, həmçinin Britaniya siyasətçisi Piter Mandelson da var idi.
2005-ci ildə 14 yaşlı bir qızın valideynləri Florida polisinə müraciət edərək Epşteynin Palm Biçdəki evində qızlarına cinsi təcavüz etdiyini bildiriblər. Polis axtarış zamanı qurbanların şəkillərini tapıb. Epşteyn qızlara evində masaj təklif edib, əksər hallarda bu, cinsi əlaqə ilə nəticələnib.
Onun şəxsi təyyarəsi 1999-2007-ci illərdə gənc qızları daşıdığı üçün media tərəfindən "Lolita Express" adlandırıldı. Federal ittihamlardan yayınmaq üçün 2008-ci ildə Epşteyn 18 ay həbs cəzasına məhkum edildi, lakin yalnız 13 ay sonra şərti azadlığa buraxıldı. Bu razılaşma "əsrin müqaviləsi" adlandırıldı.
Epşteynin yüksək səviyyəli dostlarından biri Britaniya şahzadəsi Endryu idi. 2010-cu ildə Nyu-Yorkda çəkilmiş şəkilləri mübahisələrə səbəb oldu. 2022-ci ildə Virciniya Cefri kimi tanınan Virciniya Roberts şahzadəyə qarşı cinsi istismar iddiaları üzrə milyonlarla dollar məhkəmədənkənar razılaşma əldə etdi.
Epşteyn həmçinin sosial həyatını gizli saxlamağa çalışıb, məşhurlarla münasibətlərini səthin altında saxlayırdı. Epşteynin keçmiş sevgilisi Qisleyn Maksvell 2021-ci ilin dekabrında yetkinlik yaşına çatmayan şəxslərə qarşı cinsi təcavüz və zorakılıqda iştirakına görə 20 il həbs cəzasına məhkum edildi. Məhkəmə sənədlərinə görə, Maksvell zərərçəkmişləri Epşteynin yanında sosiallaşdırır, onlara nəzarət edirdi.
Maksvell məhkəmə zamanı belə deyib:
"Cefri Epşteynlə görüşmək həyatımın ən böyük səhvi idi. Amma bu gün hökm oxundu və zərərçəkmişlərin ağrılarını azaltmaq üçün üzr istəyirəm. Ümid edirəm ki, məhkumluğum sülh gətirəcək".
Girov müqabilində azadlığa buraxılmaqdan imtina edildikdən sonra Epşteyn Nyu-York həbsxanasında qaldı. 10 avqust 2019-cu ildə kamerada onun asılmış meyiti tapıldı. O günlərdə Epşteyn nəhkəmənin nəticəsini gözləyirdi və heç vaxt ictimaiyyət qarşısında cavab verməmişdi. Onun müəmmalı ölümü və yüksək səviyyəli dostlarının iştirakı ilə kef məclisləri uzun müddət müzakirələrə səbəb oldu. Qaranlıq qalmaqal hələ də dünya mediasında aktualdır.
E.MƏMMƏDƏLİYEV,
Musavat.com
XƏBƏR LENTİ
06 Iyun 2026
ŞƏRHLƏRŞƏRH YAZ