Onlayn ictimai-siyasi qəzet
Erməni lobbisi hərəkətə keçdi – Marriott Şuşa və Xankəndi turunu ləğv etdi
Marriott Bonvoy erməni təşkilatlarının etirazından sonra Qarabağa nəzərdə tutulan tur paketini ləğv edib.
Musavat.com xəbər verir ki, bu barədə Amerika Erməni Milli Komitəsi (ANCA – Armenian National Committee of America) məlumat yayıb.
Söhbət Şuşa və Xankəndiyə səfəri əhatə edən 14 saatlıq turdan gedir. Məlumata görə, turun təsvirində ermənilərin Qarabağla bağlı qondarma tarixi iddiaları, bölgənin guya “blokadaya məruz qalması” və ermənilərin iddia edilən “etnik təmizlənməsi” ilə bağlı mövqelərinə yer verilməyib.
Tur haqqında məlumat iyulun 27-də Erməni Araşdırmaları və Təhlil Mərkəzi (CARA) tərəfindən yayılıb. Bundan sonra ANCA və müxtəlif ölkələrdə fəaliyyət göstərən digər erməni təşkilatları təklifin ləğv edilməsi tələbi ilə kampaniyaya başlayıblar.
Məlumata əsasən, kampaniyadan sonra Marriott Bonvoy Şuşa və Xankəndiyə nəzərdə tutulan turu ləğv edib.
Qeyd edək ki, Marriott Bonvoy ABŞ-nin Marriott International şirkətinə məxsus qlobal səyahət və loyallıq proqramıdır. Marriott International-ın baş qərargahı ABŞ-nin Merilend ştatının Bethesda şəhərində yerləşir. Şirkətin əsası 1927-ci ildə J. Willard Marriott və Alice Marriott tərəfindən qoyulub. Şirkət hazırda 30-dan çox brend altında dünyanın 146 ölkə və ərazisində 9 900-dən çox otel və digər yerləşdirmə obyektini əhatə edən qlobal şəbəkəyə malikdir.
Musavat.com-un qənaətinə görə, baş verən hadisə erməni diaspor təşkilatlarının və lobbi strukturlarının Azərbaycana qarşı informasiya, ideoloji və siyasi kampaniyalarını dayandırmadığını bir daha nümayiş etdirir. Xüsusilə ABŞ-da fəaliyyət göstərən Amerika Erməni Milli Komitəsi (ANCA) uzun illərdir Vaşinqtonda ən fəal erməni lobbi qurumlarından biri kimi tanınır və Azərbaycanla bağlı müxtəlif kampaniyaların əsas təşkilatçılarından hesab olunur.
Son hadisə də göstərir ki, Ermənistanla Azərbaycan arasında sülh prosesinin irəliləməsinə baxmayaraq, xaricdə fəaliyyət göstərən bir sıra erməni təşkilatları bu prosesi dəstəkləməkdən daha çox, ona təsir göstərməyə və müxtəlif istiqamətlərdə təzyiq mexanizmlərini işə salmağa çalışırlar. Bu cür kampanialar təkcə siyasi müstəvidə deyil, turizm, biznes, beynəlxalq tədbirlər və korporativ qərarlar səviyyəsində də özünü göstərir.
Bu baxımdan Azərbaycan üçün qarşıdakı dövrdə yalnız diplomatik danışıqlar deyil, həm də beynəlxalq informasiya məkanında ardıcıl fəaliyyət xüsusi əhəmiyyət daşıyacaq. Dövlət qurumları, media, ekspert çevrələri və diaspor təşkilatlarının koordinasiyalı işi ölkənin mövqeyinin dünya ictimaiyyətinə çatdırılması baxımından mühüm rol oynayacaq.
Eyni zamanda nəzərə almaq lazımdır ki, rəsmi Bakı ilə İrəvan arasında sülh sazişi imzalansa belə, bu, bütün xarici erməni diaspor təşkilatlarının və lobbi şəbəkələrinin Azərbaycana münasibətinin avtomatik dəyişəcəyi anlamına gəlmir. Ona görə də Azərbaycan uzunmüddətli informasiya, diplomatik və ideoloji rəqabətə hazır olmalı, beynəlxalq platformalarda öz mövqeyini ardıcıl və peşəkar şəkildə müdafiə etməlidir. Bu mübarizə yalnız siyasi deyil, həm də ictimai rəy, media və beynəlxalq korporativ qərarlar müstəvisində davam edəcək.
Musavat.com
XƏBƏR LENTİ
21 Avqust 2026
ŞƏRHLƏRŞƏRH YAZ