Onlayn ictimai-siyasi qəzet
Fransada sensasiya: fermerlər Trampa səsləndi – “Makronu da apar, bizi xilas et!” - Video
Fransada minlərlə fermerin iştirakı ilə keçirilən kütləvi etiraz aksiyaları getdikcə daha sərt və qalmaqallı məzmun alır. Prezident Emmanuel Makronun aqrar siyasətinə qarşı küçələrə çıxan fermerlər bu dəfə gözlənilməz şüarlarla diqqət çəkiblər.
Musavat.com xəbər verir ki, etirazlar zamanı paytaxt Paris və digər iri şəhərlərdə açılan plakatlardan birində “Trump, take Macron” (“Tramp, Makronu apar”) çağırışı yer alıb. Sosial şəbəkələrdə sürətlə yayılan bu şüar Fransa cəmiyyətində və beynəlxalq mediada geniş rezonans doğurub.
Fermerlərin narazılığının əsas səbəbi Avropa İttifaqının MERCOSUR ölkələri ilə planlaşdırılan ticarət sazişi, subsidiyaların azaldılması, ekoloji tələblərin sərtləşdirilməsi və ucuz idxal məhsullarının yerli bazarı sıxışdırmasıdır. Etirazçılar bildirirlər ki, Makron hökumətinin siyasəti Fransa kənd təsərrüfatını iflas həddinə çatdırır.
Aksiyalar zamanı fermerlər traktorlarla yolları bağlayıb, inzibati binaların qarşısında toplaşıb, bəzi yerlərdə isə polis ilə gərginlik yaşanıb. Hakimiyyət vəziyyəti nəzarətdə saxlamağa çalışsa da, narazılıq dalğası səngimir.
Siyasi müşahidəçilər hesab edirlər ki, “Tramp, Makronu apar” şüarı sadəcə ironik ifadə deyil, cəmiyyətdə prezidentə qarşı yığılan dərin qəzəbin simvoluna çevrilib. Bu isə Makronun daxili siyasətdə mövqelərinin daha da zəiflədiyini göstərir.
Musavat.com
XƏBƏR LENTİ
08 Iyun 2026
ŞƏRHLƏRŞƏRH YAZ