Onlayn ictimai-siyasi qəzet
Peskov Sərkisyanın da həbsindən danışdı
Rusiya Prezidentinin mətbuat katibi Dmitri Peskov Ermənistanda keçmiş prezidentlər Robert Koçaryan və Serj Sarkisyan barəsində başladılan cinayət işləri və saxlanılma hadisələrini "çox mürəkkəb proseslər" adlandırıb.
Musavat.com xəbər verir ki, Kreml rəsmisi İrəvanda cərəyan edən son siyasi həbslərlə bağlı jurnalistlərin suallarını cavablandırarkən ehtiyatlı pozisiya sərgiləyib.
"Mən hazırda Ermənistanın daxili siyasi hadisələrini şərh etmək istəməzdim, orada çox mürəkkəb proseslər gedir. Yalnız onu ifadə edə bilərik ki, baş verən hər şeyin qanunvericiliyə dəqiq uyğun şəkildə həyata keçiriləcəyinə və respublikadakı siyasi prosesin bütün iştirakçılarının hüquqlarına riayət olunacağına ümid edirik", – deyə Dmitri Peskov vurğulayıb.
Qeyd edək ki, avqustun 25-də Ermənistanın ikinci prezidenti Robert Koçaryan və onun böyük oğlu Sedrak Koçaryan Korrupsiyaya Qarşı Mübarizə Komitəsi tərəfindən saxlanılıb. Ona qarşı vəzifə səlahiyyətlərindən sui-istifadə, xüsusilə külli miqdarda rüşvətalma və çirkli pulların yuyulması maddələri ilə cinayət işi açılıb.
Analoji cinayət işi çərçivəsində ölkənin üçüncü prezidenti Serj Sarkisyan, sabiq mer Qagik Beqlaryan və daha 7 nəfər məsuliyyətə cəlb olunub.
Ekspertlər Moskvanın bu açıqlamasını İrəvanla gərginliyi daha da dərinləşdirməmək üçün ehtiyatlı diplomatik gediş kimi dəyərləndirirlər.
Musavat.com
XƏBƏR LENTİ
26 Avqust 2026
ŞƏRHLƏRŞƏRH YAZ