Dieqo Armando Maradonadan sonra ona “Futbol Tanrısı” deyirlər. Bu adı boşuna almayıb. Həm oynadığı oyunla, həm də xeyirxahlığı ilə dünya tərəfindən sevilir. O, hazırda Səudiyyə Ərəbistanının “Əl-Nəsr” klubunda çıxış edən, 1000 qol vurub futboldan uzaqlaşmağı qarşısına hədəf qoyan, hazırda 961 qolla dünya futbolunda ən çox qol vuran oyunçu adını qazanan Kriştiano Ronaldodur.

Əfsanənin bu gün 41 yaşı tamam olur.

Kriştiano Ronaldo Dos Santos Aveyro 5 fevral 1985-ci ildə Portuqaliyanın Madeyra adasında, Funşal şəhərində dünyaya gəlib. Dörd uşaqlı ailənin ən kiçik üzvü olan Ronaldo kasıb, amma zəhmətkeş bir mühitdə böyüyüb. Atası Joze Diniz Aveyro bağban və stadion avadanlıq işçisi, anası Mariya Dolores isə aşpaz kimi çalışırdı. Ailənin maddi imkanları məhdud olsa da, Kriştiano uşaqlıqdan futbola qarşı böyük sevgi və bağlılıq göstərirdi.

Ronaldo futbol həyatına çox erkən yaşlarda başlayıb. 8 yaşında yerli “Andorinya” klubunda oynamağa başlayan Kriştiano qısa müddətdə istedadı ilə diqqət çəkib. Daha sonra “Nasyonal” klubuna keçib və buradakı çıxışı onun karyerasında dönüş nöqtəsi olub. 12 yaşında ailəsindən ayrılaraq Lissabona – “Sportinq” klubunun akademiyasına yollanıb. Bu yaşda evdən uzaq düşmək onun üçün asan olmayıb, lakin Ronaldo çətinliklər qarşısında geri çəkilməyib.

Gənclik illərində Ronaldo ciddi sağlamlıq problemi ilə də üzləşib. Ondan ürək ritmində pozuntu aşkarlanıb və təcili əməliyyat olunub. Bir çoxları üçün bu, karyeranın sonu ola bilərdi. Amma Ronaldo qısa müddətdə sağalaraq yenidən meydana qayıdıb və bu hadisə onun xarakterini daha da möhkəmləndirib.

2003-cü ildə “Sportinq”in heyətində “Mançester Yunayted”ə qarşı yoldaşlıq oyununda parlaq çıxış edən Ronaldo ingilis klubunun diqqətini çəkib və qısa müddət sonra Premyer Liqaya transfer olunub. Ser Aleks Ferqyusonun rəhbərliyi altında o, dünya səviyyəli futbolçuya çevrilib. “Mançester Yunayted”də keçirdiyi illər ərzində ilk “Qızıl top”unu qazanıb və Avropa futbolunun zirvəsinə yüksəlib.

2009-cu ildə Ronaldo “Real Madrid”ə transfer olunub və burada futbol tarixinin ən parlaq dövrlərindən birini yaşayıb. Madrid klubunda o, yüzlərlə qol vurub, Çempionlar Liqasında rekordlar qırıb və klubun tarixində ən çox qol vuran futbolçu olub. Bu illər Ronaldo adını dünya futbolunun əfsanələri sırasına həmişəlik yazıb.

Daha sonra “Yuventus”a keçən Ronaldo İtaliya futbolunda da öz sözünü deyib. Ardınca yenidən “Mançester Yunayted”ə qayıdıb və daha sonra Səudiyyə Ərəbistanının “Əl-Nəsr” klubuna transfer olunub. Hansı ölkədə, hansı liqada çıxış etməsindən asılı olmayaraq, Ronaldo hər zaman peşəkarlığı, intizamı və qalibiyyət istəyi ilə seçilib.

Milli komandada Kriştiano Ronaldo Portuqaliya futbolunun simvoluna çevrilib. O, Portuqaliya yığmasının kapitanı kimi Avropa çempionu olub, milli komandanın tarixində ən çox oyun keçirən və ən çox qol vuran futbolçuya çevrilib. Onun milli forma altında göstərdiyi əzm və liderlik Portuqaliya futbol tarixində xüsusi yer tutur.

Kriştiano Ronaldo ailəsinə bağlılığı ilə də tanınır. O, anasına, övladlarına və yaxınlarına böyük dəyər verir. Şəxsi həyatını çox zaman mediadan uzaq saxlamağa çalışsa da, ailə dəyərlərini hər zaman ön planda tutduğunu açıq şəkildə göstərir.

Bu gün Kriştiano Ronaldo təkcə böyük futbolçu deyil. O, zəhmətin, intizamın və heç vaxt təslim olmamağın canlı nümunəsidir. Onun həyat yolu sübut edir ki, böyük uğurlar təsadüf nəticəsində deyil, inam və əzmkarlıq sayəsində qazanılır.

Bu, sadəcə təqvimdə dəyişən bir rəqəm deyil. Bu, həm də futbolda zaman anlayışını alt-üst edən, yaş anlayışını mənasızlaşdıran, insan iradəsinin və peşəkarlığının haraya qədər gedə biləcəyini sübut edən bir fenomenin növbəti mərhələsidir. Dünyaya minlərlə futbolçu gəldi-getdi, yüzlərlə ulduz parladı və söndü. Ronaldo isə fərqli oldu. O, təkcə böyük futbolçu deyil, bütöv bir dövr, bir həyat tərzi, bir düşüncə modelidir.

Madeyra adasında kasıb bir ailədə dünyaya gələn balaca Kriştiano üçün futbol əvvəlcə xəyaldan ibarət idi. O xəyallar illər sonra reallığa çevrildi, sonra isə əfsanəyə dönüb bütün dünyanı dolaşdı.

“Sportinq”də başlayan yol “Mançester Yunayted”də dünya səhnəsinə çıxdı, “Real Madrid”də tarix yazdı, “Yuventus”da yeni çağırışlara cavab verdi, milli komandada Portuqaliyanın taleyini dəyişdi. Harada oynadısa, orada iz qoydu, rekordları sındırdı, oyunun ritmini dəyişdi.

Ronaldo heç vaxt təkcə istedadına güvənmədi. Onun karyerası zəhmətin, intizamın, özünə qarşı amansız tələblərin məhsuludur. Sürət, güc, hava topları, zərbə texnikası, liderlik…İllər keçdikcə bunların heç birindən imtina etmədi. Əksinə, yaş artdıqca oyununu dəyişdi, uyğunlaşdı, daha ağıllı, daha soyuqqanlı, daha ölümcül oldu. Onun üçün “pik dövr” anlayışı mövsümlərlə ölçülmədi. Bu, onilliklərə yayıldı.

41 yaşında belə Ronaldo meydanda sadəcə oynayan futbolçu deyil. O, komandanın psixoloji dayağıdır, rəqib üçün qorxu faktoru, tribunalar üçün motivasiya mənbəyidir. Hər oyunu hadisəyə çevirir, hər toxunuşu diqqət mərkəzinə düşür. Oyun sayı artdıqca məsuliyyət azalmadı, əksinə, Ronaldo üçün hər matç özünü yenidən sübut etmək fürsətinə çevrildi.

Bu gün Kriştiano Ronaldonun həyatı yalnız futbol statistikalarından ibarət deyil. O, brenddir, simvoldur, milyonlarla gənc üçün motivasiya hekayəsidir. “Heç nə təsadüf deyil” fikrini canlı şəkildə sübut edən nadir fiqurlardandır. 41 yaşında da meydandadırsa, bu, nostalji deyil. Bu, iddianın, qalibiyyət aclığının hələ də bitmədiyinin açıq mesajıdır.

Ronaldo hekayəsi hələ bağlanmayıb. Çünki bəzi futbolçular yaşlanır, bəziləri isə tarix yazmağa davam edir.

Kriştiano Ronaldo adətən qolları, rekordları və kubokları ilə xatırlanır. Amma onun hekayəsinin başqa, çox zaman səssiz qalan bir tərəfi də var – xeyirxahlıq, empati və paylaşmaq bacarığı. Ronaldo yalnız meydanda deyil, meydandan kənarda da nümunə olmağı bacaran nadir idmançılardandır. O, şöhrəti və sərvəti şəxsi komfort zonasında saxlamaqla kifayətlənməyib, onu insanlara ümid və dəstək vermək üçün istifadə edib.

Ronaldo illərdir ki, müxtəlif xeyriyyə fondları ilə əməkdaşlıq edir, uşaqların sağlamlığı, təhsili və həyat şəraitlərinin yaxşılaşdırılması üçün milyonlarla avro ianə edir. O, xüsusilə ağır xəstəliklərdən əziyyət çəkən uşaqlara qarşı həssas münasibəti ilə seçilir. Onun bir çox xəstə uşağın müalicə xərclərini qarşıladığı, ailələrinə maddi və mənəvi dəstək verdiyi, hətta bəzi hallarda bunu gizli şəkildə etdiyi məlumdur. Ronaldo üçün xeyriyyə – reklam kampaniyası deyil, şəxsi mövqedir.

Təbii fəlakətlər zamanı da o, kənarda qalmayıb. Zəlzələlər, daşqınlar, humanitar böhranlar fonunda Ronaldonun yardım çağırışları və maliyyə dəstəyi dünya ictimaiyyətində geniş rezonans doğurub. O, ulduz statusunu yalnız populyarlıq üçün deyil, diqqəti problemlərə yönəltmək üçün alətə çevirə bilib. Bu, hər məşhurun bacardığı bir şey deyil.

Ronaldo həm də fərdi davranışları ilə xeyirxahlıq anlayışını nümayiş etdirir. O, dəfələrlə şəxsi mükafatlarını – “Qızıl top”dan tutmuş oyun formalarına qədər – hərraclara çıxararaq əldə olunan vəsaiti xeyriyyə məqsədlərinə yönəldib. Qan verməkdən imtina etməməsi, sağlam həyat tərzini təbliğ etməsi və bu səbəbdən də döymədən uzaq durması onun sosial məsuliyyətə yanaşmasının simvolik nümunələrindəndir.

Azarkeşlərlə münasibətdə də Ronaldo tez-tez humanist tərəfini ortaya qoyur. Meydana daxil olan uşaqdan tutmuş, tribunada göz yaşlarını saxlaya bilməyən azarkeşə qədər hər kəslə ünsiyyətdə diqqətli davranması, uşaqlarla şəkil çəkdirmək üçün vaxt ayırması, autizmli və ya fiziki məhdudiyyətli fanatlara xüsusi münasibəti onun “ulduz qalası” arxasında gizlənmədiyini göstərir.

Ən önəmlisi isə budur: Ronaldo xeyirxahlığı bir dəfəlik jest kimi deyil, həyat tərzi kimi qəbul edir. O, kömək etməyi borc yox, imkan kimi görür. Bəlkə də bu səbəbdən onun adı milyonlarla insan üçün təkcə futbol uğuru ilə deyil, insanlıq nümunəsi ilə də assosiasiya olunur.

Kriştiano Ronaldo 41 yaşında hələ də meydandadır. Amma onun ən böyük qələbələrindən bəziləri tablolarda yox, insanların həyatında yazılıb.

Təbriklər, ƏFSANƏ.

Bəlkə də səndən bir daha gəlməyəcək, amma o dəqiqdir ki, futbol yaşadıqca, sən də yaşayacaqsan!

Cavanşir ABBASLI
Musavat.com