Onlayn ictimai-siyasi qəzet
Ətdən imtina edənlər, DİQQƏT! – Mütəxəssis riskləri AÇIQLADI
Ət istehlakı uzun illərdir həm alimlər, həm də həkimlər arasında ən çox müzakirə olunan qidalanma mövzularından biridir. Bir tərəf ətin insan orqanizmi üçün vacib zülal, dəmir və vitamin mənbəyi olduğunu bildirir, digər tərəf isə həddindən artıq ət istehlakının müxtəlif sağlamlıq riskləri yarada biləcəyini vurğulayır.
Bəs əsl həqiqət nədir? İnsan orqanizmi üçün ət nə dərəcədə zəruridir? Ətdən tamamilə imtina etmək sağlamlığa necə təsir edir? Keyfiyyətli və təhlükəsiz əti necə seçmək lazımdır?
Musavat.com bildirir ki, mövzu ilə bağlı qida mütəxəssisi Ağa Salamov qeyd edib: "Ət təkcə dadlı qida məhsulu deyil, eyni zamanda, insan orqanizmi üçün həyati əhəmiyyət daşıyan bir sıra vacib qida maddələrinin zəngin mənbəyidir. Orqanizmin normal fəaliyyəti üçün zəruri olan bir çox vitamin, mineral və zülallar məhz ətin tərkibində mövcuddur.
İlk növbədə ət yüksək keyfiyyətli zülal mənbəyidir. Bu zülallar əzələlərin, toxumaların və hüceyrələrin formalaşması, bərpası və yenilənməsində mühüm rol oynayır. Xüsusilə uşaqların inkişafı, idmanla məşğul olan şəxslərin əzələ kütləsinin qorunması, eləcə də xəstəlik və əməliyyatlardan sonra orqanizmin bərpası üçün kifayət qədər keyfiyyətli zülal qəbul etmək böyük əhəmiyyət daşıyır.
Ətin tərkibindəki B12 vitamini isə sinir sisteminin sağlam fəaliyyətinin qorunması, qan hüceyrələrinin yaranması və enerji mübadiləsinin normal şəkildə həyata keçirilməsi üçün həyati əhəmiyyətə malikdir. Bu vitaminin çatışmazlığı insan orqanizmində yorğunluq, halsızlıq, yaddaş zəifliyi, diqqət pozğunluğu və anemiya kimi ciddi sağlamlıq problemlərinin yaranmasına səbəb ola bilər.
Ətin tərkibindəki digər mühüm komponent mioqlobindir. Mioqlobin əzələlərdə oksigenin daşınmasına və saxlanmasına kömək edən zülaldır. Bu, həm gündəlik fiziki fəaliyyət zamanı, həm də ürək-damar sisteminin normal fəaliyyəti üçün böyük əhəmiyyət kəsb edir. Mioqlobin sayəsində əzələlər oksigendən daha səmərəli istifadə edir ki, bu da fiziki dözümlülüyün artmasına, əzələlərin daha effektiv işləməsinə və yorğunluğun azalmasına müsbət təsir göstərir".
Bununla belə, qida mütəxəssisi xüsusi olaraq vurğulayıb ki, sağlam qidalanma baxımından təkcə ətin istehlakı deyil, onun hansı mənbədən əldə olunması da son dərəcə vacibdir: "Çünki ətin yalnız dadı deyil, keyfiyyəti, gigiyenik şəraitdə istehsal olunması, baytarlıq nəzarətindən keçməsi və etibarlı mənbədən alınması insan sağlamlığı üçün həlledici əhəmiyyət daşıyır. Sağlam və təhlükəsiz qidalanmanın əsas şərtlərindən biri də məhz keyfiyyətinə zəmanət verilən ət məhsullarına üstünlük verməkdir".
Xalidə Gəray,
Musavat.com
XƏBƏR LENTİ
04 Avqust 2026
ŞƏRHLƏRŞƏRH YAZ