Onlayn ictimai-siyasi qəzet
Mironov yoxa çıxdı, məşhurlar parlamentdən kənarda qaldı – Rusiyada hakimiyyətyönlü partiyada böyük dəyişiklik
Rusiyada parlament seçkilərindən sonra “Ədalətli Rusiya” partiyasının tanınmış simaları Dövlət Dumasından kənarda qalıb. Partiyanın lideri Sergey Mironov isə ictimaiyyət qarşısına çıxmır və müalicəsini davam etdirir. Onun yerini getdikcə partiyanın əsas maliyyə dəstəkçisi Aleksandr Babakov tutur.
Musavat.com Rusiya mediasına istinadən xəbər verir ki, Vladimir Putinin parlament partiyalarının rəhbərləri ilə ənənəvi seçkisonrası görüşündə ilk dəfə “Ədalətli Rusiya”nın lideri Sergey Mironov iştirak etməyib. Partiyanı görüşdə Aleksandr Babakov təmsil edib. O, Mironovun prezidentə seçkilərin uğurla keçirilməsi münasibətilə təbriklərini çatdırıb. Putin isə partiya sədrinin səhhəti ilə maraqlanıb.
Mironov avqustun sonunda Altaya səfərindən sonra ictimaiyyət qarşısına çıxmayıb. Partiya rəhbərliyi bunu onun yüngül xəsarət alması ilə izah edib. Sentyabrın əvvəlində siyasətçi xəstəxanada müalicə olunduğunu təsdiqləyib. Bununla belə, “Vyorstka” nəşri onun boyun fəqərələrinin zədələndiyini və süni tənəffüs aparatına qoşulduğunu yazıb. Bu məlumatın hazırkı vəziyyətə də aid olduğu təsdiqlənməyib.
Mironov seçkilərin nəticələrinin müzakirəsinə həsr olunmuş “Rossiya 24” telekanalının efirinə də çıxmayıb. Telekanal onun əvvəlki görüntüləri fonunda səs yazısını yayımlayıb.
RBK-nın suallarını yazılı cavablandıran partiya lideri seçki kampaniyası zamanı nöqsanlara və səhvlərə yol verildiyini etiraf edib. “Ədalətli Rusiya” beşfaizlik baryeri çətinliklə keçərək öz tarixinin ən zəif seçki nəticəsini göstərib.
Mironov bunu seçicilərin hakimiyyət ətrafında birləşməsi, rəqiblərin bahalı seçki kampaniyaları və partiya tərəfdarlarının bir hissəsinin səsverməyə qatılmaması ilə izah edib. Onun sözlərinə görə, bəzi tərəfdarlar Ukraynadakı müharibənin yaratdığı çətinliklər fonunda hakimiyyətə təsir göstərmək imkanlarına inamlarını itiriblər.
Beş il əvvəl “Ədalətli Rusiya” Zaxar Prilepinin “Həqiqət naminə” və Gennadi Semiğinin “Rusiya vətənpərvərləri” partiyaları ilə birləşərək seçkilərə qatılmış və Dövlət Dumasında 27 mandat qazanmışdı. Ötən il isə partiya əvvəlki adına qayıdıb, Prilepin və Semiğinin tutduqları həmsədr vəzifələrini ləğv edib.
Yeni çağırışda nə Prilepin, nə də Semiqin deputat olmayacaq. Prilepinin 2021-ci ildə deputat mandatını verdiyi Dmitri Kuznetsov da parlamentdən kənarda qalıb.
Partiyanın tanınmış simalarından iqtisadçı və siyasi tok-şouların daimi iştirakçısı Mixail Delyagin, mənzil-kommunal təsərrüfatı məsələləri üzrə mütəxəssis Qalina Xovanskaya və uzun illər deputat olmuş Fedot Tumusov da yeni fraksiyaya daxil edilməyib.
Bundan başqa, televiziya tamaşaçılarına yaxşı tanış olan Anatoli Vasserman, məşhur aktrisa Yelena Drapeko və aktyor-rejissor Nikolay Burlyayev də deputat mandatlarından məhrum olublar.
Burlyayev əvvəlki çağırışın son iş günündə ənənəvi dəyərlərə zidd ideologiyaların təbliğinin ekstremist fəaliyyət hesab edilməsini nəzərdə tutan qanun layihəsi təqdim edib.
Yeni fraksiyaya daxil olan dörd deputatdan üçünün Ukraynadakı müharibə ilə əlaqəsi var. Bunlar Ukraynanın keçmiş baş nazirinin birinci müavini Sergey Arbuzov, yazıçı və publisist Nikolay Starikov, həmçinin motoatıcı alayın komandiri Oleq Çernışovdur.
Partiyanın Dövlət Dumasındakı təmsilçiliyi 27 deputatdan 17-yə enib. Bununla belə, Mironov partiya və fraksiya rəhbərliyindən getməyib. Sentyabrın 28-də onun yenidən fraksiya rəhbəri seçildiyi, Aleksandr Babakov və Andrey Kuznetsovun isə birinci müavin təyin olunduğu açıqlanıb.
Partiya Babakovun Dövlət Duması sədrinin müavini vəzifəsində qalmasını da təklif edir. “MO” nəşrinin məlumatına görə, partiyanın əsas maliyyə dəstəkçisi sayılan Babakovun sərvəti hələ 2021-ci ildə diqqət mərkəzində olub. Forbes həmin il onu dövlət qulluqçuları arasında təxminən 500 milyon rubl gəlirlə siyahıya daxil edib.
Nəşrin partiyadakı mənbələri iddia edirlər ki, seçkiqabağı qurultayın xərclərini də məhz Babakov ödəyib. Onun əvvəllər əsas biznes aktivlərindən biri Ukraynanın enerji bazarında fəaliyyət göstərən VS Energy şirkətlər qrupu olub. Ukrayna hakimiyyəti isə Babakov və biznes tərəfdaşı Yevgeni Gineri Rusiyanın hərbi sənaye kompleksi ilə əməkdaşlıq ittihamı əsasında axtarışa verib.
Beləliklə, “Ədalətli Rusiya” yeni parlamentə əvvəlki çağırışla müqayisədə daha az deputatla və xeyli dəyişmiş heyətlə daxil olur. Mironov rəhbərliyini qoruyub saxlasa da, partiyanın parlamentdəki tanınmış simalarının böyük hissəsi artıq yeni fraksiyada təmsil olunmur.
Musavat.com
XƏBƏR LENTİ
12 Oktyabr 2026
ŞƏRHLƏRŞƏRH YAZ