Onlayn ictimai-siyasi qəzet
Rumıniyada ruslar üçün vətəndaşlıq “fabriki” ifşa olundu
Rumıniyada rusiyalıların ölkə vətəndaşlığını əldə etməsi məqsədilə saxta sənədlərin hazırlanması ilə bağlı cinayət işləri araşdırılır.
Musavat.com xəbər verir ki, bu barədə “Le Monde” qəzeti məlumat yayıb.
Bildirilir ki, bu ilin dekabr ayında Rumıniyada sözügedən iki cinayət işi çərçivəsində təxminən 37 reyd keçirilib. Araşdırma nəticəsində 2022-ci ildə yaradılmış cinayətkar qrupun mövcudluğu üzə çıxıb. Qrup əsasən Rumıniyada yaşayan yeddi Ukrayna vətəndaşından ibarət olub və onlara yerli hüquqşünaslar, tərcüməçilər və notariuslar yardım göstərib.
İstintaqın məlumatına görə, 2025-ci ildə bu şəbəkə 900-dən çox vətəndaşlıq müraciəti təqdim edib və müraciətlərin böyük hissəsi rusiyalılar üçün saxta sənədlər əsasında hazırlanıb.
Rumıniya hakimiyyət orqanları bildirir ki, 2022-ci ildən bəri vətəndaşlıqla bağlı təxminən 2 min şübhəli fırıldaqçılıq halı müəyyən edilib. Paytaxt Buxarestdə bələdiyyə artıq 68 Rumıniya şəxsiyyət vəsiqəsini ləğv edib, daha 300 müraciətin isə ləğvi hazırda nəzərdən keçirilir.
Rumıniyanın Milli Vətəndaşlıq İdarəsinin məlumatına əsasən, 2023-cü ildə 6,6 min, 2024-cü ildə isə 4,5 min Rusiya vətəndaşı repatriasiya yolu ilə vətəndaşlıq üçün müraciət edib. Müqayisə üçün qeyd olunur ki, 2012–2022-ci illər arasında bu göstərici cəmi 5,2 min olub. Belarus vətəndaşlarından müraciətlərin sayı da kəskin artıb: 2020-ci ildə 95, 2024-cü ildə isə 605 müraciət qeydə alınıb.
1991-ci ildən etibarən Rumıniya qanunvericiliyi ölkədə yaşamadan vətəndaşlıq almağa imkan verir - bunun üçün şəxsin 1918–1940-cı illərdə mövcud olmuş Rumıniya Krallığı ərazisində yaşamış və ya doğulmuş əcdadlara malik olduğunu sübut etməsi kifayətdir.
Qəzetin vurğuladığına görə, son illərdə inzibati boşluqlardan istifadə edən cinayətkar şəbəkələr formalaşıb və onlar “repatriantlar” üçün saxta genealoji sənədlər hazırlayırlar. Xüsusilə İkinci Dünya müharibəsi və sovet dövründə arxivlərin məhv edilməsi bu cür saxtakarlıqlar üçün əlverişli şərait yaradıb.
Musavat.com
XƏBƏR LENTİ
06 Iyun 2026
05 Iyun 2026
ŞƏRHLƏRŞƏRH YAZ