Onlayn ictimai-siyasi qəzet
Rus məmurları dinlənilməkdən qorxur – Milyonluq müdafiə
Rusiyanın müxtəlif regionlarında dövlət qurumları kabinetlərdə aparılan danışıqların gizli şəkildə dinlənilməsinin qarşısını almaq üçün xüsusi avadanlıqları kütləvi şəkildə almağa başlayıblar. Son iki ildə bu məqsədlə ən azı 20 milyon rubl xərcləndiyi bildirilir.
Musavat.com xarici agentliklərə istinadla xəbər verir ki, bu barədə “Mash” dövlət satınalmalarının məlumatlarını araşdıraraq yazıb.
Məmurlar əsasən iki növ müdafiə sistemi alırlar. Onlardan biri pəncərə şüşəsinə bərkidilərək vibrasiya yaradır və şüşə vasitəsilə otaqdakı səslərin qeydə alınmasını çətinləşdirir. Digər qurğu isə qapı, havalandırma sistemi və ya tavana yaxın yerləşdirilərək xüsusi səs-küy yaradır və söhbətlərin yazılmasına mane olur.
Bu avadanlıqların Rusiya istehsalı olması tələb edilir, onları dövlət qurumlarına təqdim edən şirkətlər isə dövlət sirri ilə əlaqəli fəaliyyət üçün müvafiq lisenziyaya malik olmalıdırlar.
Mənbənin məlumatına görə, dinlənilmədən qorunmağa ən çox pul Başqırdıstanda xərclənib – 1,1 milyon rubl. Rusiya Elmlər Akademiyası bu məqsədlə 666 min rubl, Uzaq Şərq Gömrük İdarəsi 500 min rubl, Bryansk Vilayət Duması isə 400 min rubl xərcləyib.
Maraqlıdır ki, həmin qurum və regionların bir neçəsində son illərdə iri korrupsiya cinayətləri üzrə istintaqlar aparılıb.
Başqırdıstan baş nazirinin keçmiş müvəqqəti müavini Alan Marzayev tikinti şirkətlərindən 37 milyon rubl rüşvət almaqda təqsirli bilinərək 13 il həbs cəzasına məhkum edilib.
Bryansk vilayətində isə 2025-ci ildə keçmiş vitse-qubernator Nikolay Simonenko və regional tikinti idarəsinin rəhbəri Yevgeni Jura saxlanılıb. Onların adı dövlətə 818 milyon rubl ziyan vurulduğu iddia edilən vəzifə səlahiyyətlərindən sui-istifadə işi ilə əlaqələndirilib. Keçmiş qubernator müavini Sergey Timoşenko isə 7 milyon rubl rüşvət almaq işi üzrə təqsirləndirilən şəxs olub.
Rusiya Elmlər Akademiyasında da böyük maliyyə qalmaqalı yaşanıb. Akademiya prezidentinin keçmiş müavini Konstantin Solntsev 2025-ci ildə qurumun 168,7 milyon rubl vəsaitinin mənimsənilməsi və həmin pulların leqallaşdırılması işi üzrə təqsirli bilinib.
Uzaq Şərq Gömrük İdarəsində isə təkcə 2025-ci ildə korrupsiya ilə bağlı ən azı səkkiz cinayət işinin açıldığı bildirilir.
Beləliklə, dövlət qurumlarının kabinetləri dinlənilmədən qorumaq üçün milyonlarla rubl xərcləməsi, bu satınalmaların həyata keçirildiyi bəzi strukturların eyni zamanda iri korrupsiya işləri ilə gündəmə gəlməsi diqqət çəkir.
Musavat.com
XƏBƏR LENTİ
02 Sentyabr 2026
01 Sentyabr 2026
ŞƏRHLƏRŞƏRH YAZ