Onlayn ictimai-siyasi qəzet
Rusiya hökumətində böyük dəyişiklik gözlənilir: “Kovalçukların adamı” gəlir
Rusiya hökumətində yaxın vaxtlarda mühüm kadr dəyişikliklərinin baş verə biləcəyi bildirilir. Baş nazirin müavini Vitalı Savelyevin vəzifəsindən ayrılacağı, onun yerinə isə hazırkı nəqliyyat naziri Andrey Nikitinin əsas namizəd olduğu iddia edilir.
Musavat.com xarici mediaya istinadən xəbər verir ki, Savelyev hökumətdən getdikdən sonra heç olmasa müəyyən vəzifəsini qorumaq üçün “Aeroflot”un direktorlar şurasında qalmağa çalışır, lakin indiyədək buna nail ola bilməyib.
Vitse-premyer postuna isə faktiki olaraq yalnız bir namizəd göstərilir – nəqliyyat naziri Andrey Nikitin. Mənbə onu Kremlin ən nüfuzlu biznes-siyasi qruplarından biri hesab edilən Kovalçuk qardaşlarının protejesi adlandırır.
İddiaya görə, Nikitinin nəqliyyat naziri təyin olunması elə əvvəldən gələcəkdə onun vitse-premyer postuna keçirilməsi hesablanaraq həyata keçirilib. Mənbə bildirir ki, Nikitin də bu perspektivdən xəbərdardır və nazirlikdə son dərəcə ehtiyatlı davranır.
“O, sözün əsl mənasında nazirlikdə heç nəyə toxunmamağa çalışır ki, üzərinə heç nə sıçramasın. Starovoytun bütün komandasını saxlayıb, heç yerə qarışmır və müdaxilə etmir”, –deyə anonim mənbə qeyd edib.
Nikitinin vitse-premyerliyə keçəcəyi təqdirdə isə nəqliyyat naziri postu uğrunda üç əsas namizədin mübarizə apardığı bildirilir.
Onlardan biri Federal Hava Nəqliyyatı Agentliyinin – “Rosaviasiya”nın rəhbəri Dmitri Yadrovdur. Mənbə Yadrovu Rotenberqlərin və Savelyevin namizədi kimi təqdim edir. Lakin onun şanslarının son vaxtlar ciddi şəkildə zəiflədiyi iddia olunur.
Buna səbəb “Protektor” şirkətlər qrupuna sanksiyalardan yan keçməklə aviasiya ehtiyat hissələrinin alınması üçün ayrılmış vəsaitlərin mənimsənilməsi ilə bağlı qalmaqaldır. Mənbəyə görə, bu iş Yadrovun nazir olmaq perspektivinə ciddi zərbə vurub.
Nəqliyyat naziri vəzifəsinə digər iki namizəd isə nazirin birinci müavini Konstantin Paşkov və nazir müavini Aleksey Şilodur.
Beləliklə, iddialar təsdiqlənərsə, dəyişiklik təkcə bir baş nazir müavininin gedişi ilə məhdudlaşmayacaq. Savelyevin hökumətdən çıxması, Nikitinin yüksəlişi və boşalacaq Nəqliyyat Nazirliyi uğrunda mübarizə Rusiyanın hakimiyyət daxilindəki nüfuzlu qruplar arasında yeni kadr bölgüsünə çevrilə bilər.
Musavat.com
XƏBƏR LENTİ
23 Avqust 2026
ŞƏRHLƏRŞƏRH YAZ