Onlayn ictimai-siyasi qəzet
410 il əvvəl yazılan qorxunc mesaj yenidən göründü - “Məni görürsənsə, ağla” - FOTO
Avropada yüksək temperatur və uzun sürən quraqlıq çaylarda suyun səviyyəsinin aşağı düşməsinə səbəb olub. Sular çəkildikcə əsrlər boyu çayların dibində gizlənən tarixi daşlar yenidən üzə çıxır.
Musavat.com xəbər verir ki, bunların arasında “aclıq daşları” adlandırılan tarixi qayalar xüsusi diqqət çəkir.
Belə daşlardan biri Çexiyanın Deçin şəhəri yaxınlığında Elba çayında yerləşən məşhur Deçin daşıdır. Suyun səviyyəsinin aşağı düşməsi nəticəsində daş yenidən görünməyə başlayıb.
Daşın üzərində alman dilində “Wenn du mich siehst, dann weine” sözləri həkk olunub. Azərbaycan dilində bu ifadə “Məni görürsənsə, ağla” mənasını verir.
Əsrlər boyu Elba, Dunay və Reyn kimi Avropanın böyük çaylarında suyun səviyyəsi kəskin aşağı düşəndə insanlar çayın dibindəki iri daşların üzərinə tarixlər və müxtəlif qeydlər həkk ediblər. Bəzi “aclıq daşları”nda 1616, 1746 və 1842-ci illərə aid tarixlər qalmaqdadır.
2020-ci ildə “Climate of the Past” elmi jurnalında dərc edilən araşdırma göstərib ki, Elbadakı “aclıq daşları” üzərindəki bir çox tarix və su səviyyəsi işarələri sənədləşdirilmiş son dərəcə aşağı su səviyyəsi dövrləri ilə dəqiq uyğunlaşır.
Alimlərin qənaətinə görə, daşlardakı işarələr yalnız quraqlıq illərini gələcək nəsillərə xatırlatmaq üçün deyil, həm də çayda suyun nə qədər aşağı düşdüyünü qeydə almaq məqsədilə həkk edilib.
Bununla belə, Deçin daşı daha çox əsrlər əvvəldən gələn məşhur və vahiməli mesajı ilə tanınır:
“Məni görürsənsə, ağla”.
Musavat.com
XƏBƏR LENTİ
26 Avqust 2026
25 Avqust 2026
ŞƏRHLƏRŞƏRH YAZ