Onlayn ictimai-siyasi qəzet
Salat yeyəcəksiniz, amma ət dadı verəcək – alimlərdən qeyri-adi gen dəyişikliyi
Britaniyalı alimlər qeyri-adi genetik təcrübəyə imza ataraq bitkilərdə heyvan mənşəli mioqlobin zülalının istehsalına nail olublar.
Musavat.com xəbər verir ki, London İmperial Kollecinin tədqiqatçıları donuz mioqlobininin istehsalına cavabdeh geni kahı və tütün bitkilərinin hüceyrələrinə yerləşdiriblər.
Mioqlobin əzələ toxumasında olan zülaldır və ətin xarakterik qırmızı rənginin, eləcə də ona xas dad xüsusiyyətlərinin formalaşmasında mühüm rol oynayır.
Alimlər geni bitki hüceyrələrinə çatdırmaq üçün gen silahı adlandırılan üsuldan istifadə ediblər. Bu metod zamanı DNT mikroskopik qızıl hissəcikləri vasitəsilə hüceyrələrə ötürülüb. Gen xloroplastlara yerləşdirilib ki, bu da bitkilərin böyük miqdarda mioqlobin istehsal etməsinə imkan yaradıb.
Təcrübənin diqqətçəkən nəticələrindən biri genetik dəyişdirilmiş bitkilərin həyat qabiliyyətini qoruması və yeni xüsusiyyəti sonrakı nəsillərə ötürə bilməsidir.
Gələcəkdə alimlər mioqlobini yarpaqlardan çıxararaq bitki əsaslı burgerlərə və digər məhsullara əlavə etməyi planlaşdırırlar. Məqsəd belə məhsulların dadını, rəngini və qida dəyərini yaxşılaşdırmaqdır.
Tədqiqatçıların fikrincə, zülalın bitkilərdə istehsalı mikroorqanizmlərdən istifadə edilən bəzi mövcud üsullardan daha səmərəli ola bilər.
Musavat.com
XƏBƏR LENTİ
25 Avqust 2026
ŞƏRHLƏRŞƏRH YAZ