Onlayn ictimai-siyasi qəzet
Talibanın yeni qadağası DƏHŞƏTƏ GƏTİRDİ
Əfqanıstanda hakimiyyətdə olan Taliban rəhbərliyi hökumət əməkdaşları və təşkilat üzvləri üçün ağıllı telefon istifadəsini məhdudlaşdıran yeni şifahi göstəriş verib. Qərardan sonra bəzi üzvlərin telefonlarını qıraraq qadağanı dəstəklədiyini əks etdirən görüntülər sosial şəbəkələrdə geniş yayılıb.
Musavat.com xəbər verir ki, məlumata görə, göstəriş Taliban lideri Hibatullah Axundzadə tərəfindən verilib. Sızdırılan sənədlərdə qadağaya əməl etməyən şəxslərin hərbi məhkəməyə göndərilə biləcəyi və qaydalara ciddi nəzarət olunacağı qeyd edilir.
Sosial mediada yayılan videolarda bəzi üzvlərin ağıllı telefonlarını yerə çırparaq və ya sındıraraq rəhbərliyə sadiqlik nümayiş etdirdiyi görünür. Görüntülər qısa müddətdə milyonlarla baxış toplayıb və beynəlxalq mediada da diqqət çəkib.
Bununla yanaşı, ekspertlər qərarın Taliban administrasiyasının gündəlik fəaliyyətinə mənfi təsir göstərə biləcəyini bildirirlər. Çünki son illərdə rəsmi yazışmaların, göstərişlərin və yerli idarəetmə koordinasiyasının mühüm hissəsi ağıllı telefonlar və xüsusilə WhatsApp vasitəsilə həyata keçirilib.
Mütəxəssislərin fikrincə, texnologiyaya qarşı sərt mövqe ilə rəqəmsal rabitə vasitələrindən asılılıq arasında yaranan ziddiyyət qərarın ən çox müzakirə olunan tərəflərindən biridir. Taliban rəhbərliyi daha əvvəl də ağıllı telefon istifadəsini azaltmaq istiqamətində addımlar atmış, bəzi təhsil müəssisələrində oxşar məhdudiyyətlər tətbiq etmişdi.
Hadisə sosial şəbəkələrdə geniş müzakirələrə səbəb olub. Bir çox istifadəçi telefonların qırılmasını simvolik addım kimi qiymətləndirərkən, digərləri bu cür qadağaların müasir idarəetmə və kommunikasiya sistemləri ilə uyğunlaşmadığını qeyd edirlər.
Musavat.com
XƏBƏR LENTİ
10 Iyun 2026
ŞƏRHLƏRŞƏRH YAZ