Onlayn ictimai-siyasi qəzet
Vensə yaxın olan ABŞ Ordu naziri istefaya hazırlaşır - Heqsetlə gərginlik
ABŞ Ordu naziri Den Driskol ilin sonuna qədər, bəlkə də daha tez vəzifəsindən ayrılacaq.
Musavat.com The Wall Street Journal-a istinadən xəbər verir ki, nazir bu addımı Pentaqonun rəhbəri Pit Heqsetlə gərgin münasibətlərə görə atacaq.
Bu yay Driskol və ailəsi Virciniyadakı Mayer-Henderson Holl Birgə Bazasındakı rəsmi evlərindən köçüb. Ailəsi Şimali Karolinaya, nazirin özü isə bazadakı daha kiçik bir mənzilə köçdü.
Qeyd edək ki, aprel ayında Heqset general Rendi Corcu heç bir izahat vermədən Ordu Baş Qərargah rəisi vəzifəsindən azad etdi və Prezident Donald Tramp hələ də bu vəzifəyə namizəd irəli sürməyib. Hazırkı Baş Qərargah rəisinin səlahiyyətlərini Müdafiə nazirinin baş hərbi köməkçisi vəzifəsində çalışan general Kristofer LaNiv icra edir.
Ordu Katibi olduğu on səkkiz ay ərzində Driskol Corcla sıx tərəfdaşlıq münasibətləri qurmuşdu. Birlikdə onlar orduya yeni texnologiyaların tətbiqi üçün səy göstərirdilər və Avropadakı ABŞ qüvvələrinin keçmiş komandanı general Kris Donaho ilə Ukraynaya səfər etmişdilər.
Aprel ayında "The Atlantic" mənbələrə istinadən Ağ Evin Driskolun istefası da daxil olmaqla bir neçə istefanı müzakirə etdiyinə dair məlumat yayıb. Ötən ilin sonlarında The Telegraph qəzeti Ordu nazirinin Heqsetin xahişi ilə Ukrayna münaqişəsinin həlli prosesindən uzaqlaşdırıldığını bildirmişdi.
CNN Pentaqon rəhbəri ilə gərginliyi Driskolun Ağ Evə və vitse-prezident J.D.Vensə yaxınlığı ilə əlaqələndirir (onlar birlikdə kollecdə oxuyublar). Şəbəkənin məlumatına görə, Tramp administrasiyası bir neçə aydır ki, Müdafiə nazirinin Driskol ilə əvəz edilməsi ehtimalını sakitcə müzakirə edirdi. The Financial Times qəzeti həmçinin Heqsetin istefa verəcəyi təqdirdə onun vəzifəsinə namizəd ola biləcəyini yazıb. Driskolun özü Pentaqon rəhbəri ilə hər hansı fikir ayrılığını təkzib edib.
Musavat.com
XƏBƏR LENTİ
22 Avqust 2026
ŞƏRHLƏRŞƏRH YAZ