Onlayn ictimai-siyasi qəzet
Böyük türkoloq haqqında monoqrafiya nəşr olundu
Bu günlərdə Azərbaycan Milli Elmlər Akademiyası Folklor İnstitutunun Türk xalqları folkloru şöbəsinin baş elmi işçisi, mühacirət ədəbiyyatı ilə bağlı çoxsaylı yazıların müəllifi, filologiya elmləri doktoru, professor Almaz Həsənqızının “Əhməd Cəfəroğlunun folklor araşdırmaları” adlı monoqrafiyası nəşr olunub. Folklor İnstitutu Elmi Şurasının qərarı ilə Azərnəşrdə nəfis şəkildə yayımlanan, I Türkoloji Qurultayın 100 illiyinə ithaf olunmuş kitabın elmi redaktoru professor Tofiq Məlikli, ön sözün müəllifi professor Osman Fikri Sertkaya, rəyçiləri isə professor Sebahattin Şimşir və professor Pərvanə Bayramdır.
XX yüzil Azərbaycan mühacirətinin görkəmli nümayəndəsi, dünya şöhrətli türkoloq, uzun illər İstanbul Universitetinin Türk dili və ədəbiyyatı kafedrasının professoru vəzifəsində çalışmış, “Azərbaycan yurd bilgisi”, “Türk amacı”, “Türk dili və ədəbiyyatı” dərgilərinin qurucusu və baş redaktoru olmuş Əhməd Cəfəroğlu haqqında yazılan monoqrafiyada onun folklorla bağlı araşdırmaları sistemli təhlil obyektinə çevrilmişdir. Kitabda alimin folklorşünaslıq axtarışları türkoloji araşdırmaları ilə əlaqəli şəkildə dəyərləndirilmiş, Türkiyədə və dünyanın müxtəlif ölkələrində yayınlanan, lakin indiyədək diqqətdən kənarda qalmış 150-dək əsəri ilk dəfə tədqiqata çəkilmişdir.
Monoqrafiyaya yazdığı əhatəli ön sözdə Əhməd Cəfəroğlunu Mahmud Kaşğarlı və Fridrix Vilhelm Radloffdan sonra dünyanın üçüncü böyük türkoloqu kimi dəyərləndirən professor Osman Fikri Sertkaya onun həyatının araşdırıcıların diqqətindən yayınmış müəyyən məqamlarına toxunmuş, yazılarına və siyasi baxışlarına görə İ.V.Stalinin təkidi ilə Sovet Rusiyasına təhvil verilməsinin istəndiyini, lakin Türkiyə Cümhuriyyətinin qurucusu Mustafa Kamal Atatürkün keçici olaraq İstanbul Universitetindən uzaqlaşdırmaqla məsələni yoluna qoyduğunu qeyd etmişdir.
Monoqrafiyanın “Sayaçı sözlərinin arxaik düşüncə qatları”, Azərbaycan bayatılarının Avropada tanıdılması”, “İnanc və ovsunların funksional-semantik təhlili”, “Paremioloji vahidlərin fərqli yozumu”, “Türk mifoloji sistemi onomastik düşüncə axarında”, “Qopuzun dünya kültüründə yeri və aşıq sənəti”, “Əfsanə, lətifə və nağılların ideya-estetik özəllikləri”, “Türk epik ənənəsi və dastan poetikası”, “Folklor mətnlərinin toplanması və sistemləşdirilməsi sahəsindəki fəaliyyəti”, “Tanıtım yazıları” və başqa bölmələrində Əhməd Cəfəroğlunun zəngin folklor araşdırmaları sistemli şəkildə təhlilə çəkilmişdir.
Kitabda, eyni zamanda Əhməd Cəfəroğlunun dünya türkologiyasına töhfələri barədə ayrıca bəhs olunmuş, həmçinin xatirələr işığında həyat və yaradıcılığının indiyədək bilinməyən məqamlarına toxunulmuşdur.
Musavat.com
XƏBƏR LENTİ
21 Avqust 2026
ŞƏRHLƏRŞƏRH YAZ