Onlayn ictimai-siyasi qəzet
Zelenski Putinə məktub yazdı - GÖRÜN nə təklif etdi
Ukrayna Prezidenti Volodimir Zelenski Rusiya Prezidenti Vladimir Putinə açıq məktub ünvanlayıb.
Musavat.com xəbər verir ki, məktub Ukrayna Prezidentinin rəsmi saytında dərc olunub.
Məktubda Zelenski müharibənin başa çatdırılması üçün birbaşa danışıqlara başlamağın vacibliyini vurğulayıb. Ukrayna lideri qeyd edib ki, əsas məsələlər məhz liderlər səviyyəsində həll edilməlidir.
O, Rusiya Prezidenti Vladimir Putinə şəxsi görüş keçirməyi təklif edib və görüş üçün neytral məkanın seçilə biləcəyini bildirib.
Görüş Moskvada və Kiyevdə mümkün deyil
Zelenski məktubunda Rusiya tərəfinin daha əvvəl görüşün yalnız Moskvada keçirilə biləcəyi ilə bağlı mövqeyinə də toxunub. Ukrayna lideri qeyd edib ki, baş verənlərdən sonra nə Ukrayna liderinin Moskvada, nə də Rusiya liderinin Kiyevdə görüş keçirməsi real görünür.
“Hamı nümayəndələrinizin gülümsəyərək mənim guya Moskvaya gələ biləcəyimi dediyini eşidib. Amma bütün baş verənlərdən sonra Ukrayna liderinin sizin paytaxtınızda, Rusiya liderinin isə Kiyevdə işi yoxdur. Müharibə və sülh məsələlərinin həlli üçün liderləri ənənəvi olaraq qəbul edən ölkələr var. İsveçrə, Türkiyə, ərəb ölkələri bu görüşə ev sahibliyi edə bilər. Görüş yerini müəyyənləşdirməyi təklif edirəm”, - Zelenski məktubunda yazıb.
Ukrayna atəşkəsə tam hazırdır
Məktubda Ukraynanın danışıqlar müddətində tam atəşkəsə hazır olduğu da qeyd edilib. Zelenski bildirib ki, danışıqlar aparıldığı müddətdə hərbi əməliyyatların dayandırılması sülh prosesinə şərait yarada bilər.
Atəşkəs rejiminə nəzarətin ABŞ tərəfindən təmin oluna biləcəyi də məktubda yer alan təkliflər sırasındadır.
Əsir mübadiləsi
Kiyev hərbi əsirlərin “hamının hamıya” prinsipi ilə dəyişdirilməsinə razı olduğunu da bildirib.
Bundan başqa, məktubda mülki şəxslərin və uşaqların geri qaytarılması məsələsi xüsusi vurğulanıb. Zelenski bu prosesdən sonra uzunmüddətli təhlükəsizlik təminatlarının müzakirəsinə keçilməsini təklif edib.
Görüş üçün üç mümkün istiqamət
Zelenski mümkün danışıqlar məkanı kimi İsveçrəni, Türkiyəni və ərəb ölkələrindən birini qeyd edib.
Onun sözlərinə görə, bu ölkələr ənənəvi olaraq müharibə və sülh məsələləri üzrə liderləri qəbul edən məkanlar kimi çıxış edə bilər.
Məktubda həmçinin ikitərəfli formata sonradan ABŞ və Avropa ölkələrinin də qoşula biləcəyi bildirilib.
Musavat.com
XƏBƏR LENTİ
05 Iyun 2026
04 Iyun 2026
ŞƏRHLƏRŞƏRH YAZ