Onlayn ictimai-siyasi qəzet
Rus ordusunda ölən azərbaycanlıların ŞOK statistikası - Yeni XƏBƏRDARLIQ
Rusiyanın Ukraynaya qarşı genişmiqyaslı işğalı zamanı Rusiya tərəfdə döyüşərkən azı 3 589 əcnəbi həlak olub. Bu, BBC-nin apardığı hesablamalara əsaslanır. Onlar 40-dan çox ölkənin vətəndaşlarıdır: Ekvador və ABŞ-dan tutmuş Vyetnam və Şri-Lankayadək.
Azərbaycan Ukraynada Rusiya tərəfindən döyüşlərdə vətəndaşları daha çox həlak olan 3 MDB ölkəsi arasındadır. Belə ki, Özbəkistan 229, Tacikistan 199, Azərbaycan 108 vətəndaşını itirib. Baş Prokurorluq çağırış edib ki, münaqişə ocaqları olan ərazilərə səfər etməkdən çəkinin.
Bütün bunların qarşısını almaq üçün hansı preventiv tədbirlər görmək olar?
Politoloq Züriyə Qarayeva Müsavat.com-a söylədi ki, bu statistika xarici ölkə vətəndaşlarının müxtəlif vədlər, yüksək maaş təklifləri, hüquqi məlumatsızlıq və bəzi hallarda aldadılma yolu ilə Rusiya ordusuna cəlb edildiyini göstərir: "BBC-nin araşdırmasına görə, Ukraynaya qarşı döyüşlərdə Rusiya tərəfində həlak olan azı 3 589 əcnəbi arasında 108 Azərbaycan vətəndaşının olması ciddi xəbərdarlıq siqnalıdır. (bbcrussian.substack.com) Bunun qarşısını almaq üçün ilk növbədə xaricdə iş, yüksək gəlir və sürətlə vətəndaşlıq almaq adı altında yayılan hərbi müqavilə təkliflərinə qarşı geniş maarifləndirmə aparılmalıdır. Xüsusilə Rusiyaya işləməyə gedən vətəndaşlara sərhəd-keçid məntəqələrində, konsulluqlarda və sosial şəbəkələr vasitəsilə hüquqi məsuliyyət və real təhlükələr barədə məlumat verilməlidir. Bununla yanaşı, insanları döyüş bölgələrinə cəlb edən vasitəçilər, sosial media səhifələri və qeyri-rəsmi işədüzəltmə şəbəkələri müəyyən edilərək onların fəaliyyəti hüquq-mühafizə orqanları tərəfindən araşdırılmalıdır. Azərbaycan vətəndaşlarına xarici dövlətlərin silahlı birləşmələrində iştirakın doğura biləcəyi cinayət-hüquqi nəticələr aydın şəkildə izah edilməli, risk qrupuna daxil olan şəxslərin ailələri ilə qabaqlayıcı iş aparılmalıdır. Diplomatik nümayəndəliklərə müraciət imkanları geniş təbliğ olunmalı, müqavilə bağlamağa məcbur edilən və ya aldadılan vətəndaşlar üçün məxfi qaynar xətt yaradılmalıdır. Yalnız ümumi çağırışlarla kifayətlənmək deyil, işə qəbul kanallarının bağlanması, operativ məlumat mübadiləsi və konkret hüquqi mexanizmlərin tətbiqi bu təhlükənin miqyasını azalda bilər".
Cavanşir Abbaslı,
Musavat.com
XƏBƏR LENTİ
27 Avqust 2026
ŞƏRHLƏRŞƏRH YAZ