Onlayn ictimai-siyasi qəzet
Tramp Kanadanı Pekinə doğru "qovur" – CNN-dən xəbərdarlıq
ABŞ Prezidenti Donald Trampın Kanadaya qarşı ticarət müharibəsi, son illərdəki gərgin münasibətlərinə baxmayaraq, Ottavanı Pekinlə daha sıx əlaqələrə sövq edir.
Musavat.com xəbər verir ki, bu, CNN-in hazırladığı geniş materialda yer alıb. Kanalın məlumatına görə, bu yaxınlarda keçirilən APEC forumu çərçivəsində Çin rəhbəri Si Cinpin Kanadanın Baş naziri Mark Karni ilə görüşüb və görüş zamanı liderlər iki ölkə arasında münasibətləri sabitləşdirmək üçün işə başlamaq barədə razılığa gəliblər: "Cəmi bir il əvvəl belə bir mənzərə ağlasığmaz görünürdü: Kanada və Çin liderləri yan-yana dayanıb əl sıxışır və gülümsəyir".
Ottava və Pekin arasındakı münasibətlər 2018-ci ildə Huawei-in maliyyə direktoru Menq Vançjou Vankuverdə saxlanıldıqda və fırıldaqçılıq və ABŞ-ın İrana qarşı sanksiyalarını pozmaq ittihamı ilə ABŞ-a deportasiya olunmaqla üzləşdikdə kəskin şəkildə pisləşib. Qısa müddət sonra Çin hakimiyyəti iki Kanada vətəndaşını Çinin milli təhlükəsizliyini təhdid etmək ittihamı ilə Pekində saxlayıb. 24 sentyabr 2021-ci ildə Nyu-Yorkun Şərq Dairəsi Menq Vançjou ilə ABŞ hakimiyyəti arasında razılaşmanı təsdiqləyib və bu, onun ABŞ-a ekstradisiya olunmamasına imkan verib. Elə həmin gün Çin Ottavanın həbsini qanunsuz hesab etdiyi iki kanadalını azad edib. Bundan əlavə, Kanada əvvəllər dəfələrlə Çinin Sincan Uyğur Muxtar Bölgəsində və Honkonqda insan haqlarının pozulmasına görə Çinə qarşı addımlar atıb.
CNN-in məlumatına görə, bu diplomatik mübarizə iki ölkə arasında münasibətləri gərginləşdirib və "Ottava ilə Pekin arasında dərin inamsızlıq yaradıb", lakin Prezident Tramp ABŞ-ın ən yaxın müttəfiqlərindən biri ilə ticarət müharibəsini qızışdırdığı üçün "Kanada ortaq məxrəc axtarışı ilə uzun müddətdir düşmən hesab etdiyi Pekinə yönəlib". Bu, Kanada ilə Çin arasında Çin elektrik avtomobillərinə tariflər və Çinin Kanada rapsına qarşı cavab tarifləri ilə başlayan ticarət müharibəsi fonunda baş verir. Kanalın hesabatında deyilir ki, ABŞ artıq Kanadanın ən böyük iqtisadi təhdidi kimi ortaya çıxdığı üçün Ottavanın "dünyanın ən böyük iki iqtisadiyyatı ilə ticarət müharibəsi aparmağa imkanı çatmır".
CNN qeyd edir ki, Çinlə münasibətlər indi kanadalılar üçün daha ümidverici görünür, buna görə də "Kanadanın Çinə qarşı tonu son aylarda 180 dərəcə dəyişib". Kanal həmçinin hesab edir ki, "Çin bu həssas anda Kanadanı istismar etməyə çalışa bilər".
Ottava və Vaşinqton 1 avqusta qədər ticarət razılaşmasına nail ola bilmədikdən sonra Tramp Kanada-Meksika-Amerika Birləşmiş Ştatları Azad Ticarət Sazişi ilə əhatə olunmayan bir sıra mallara tarifləri 25 faizdən 35 faizə qaldıran bir sərəncam verdi. Kanada bir neçə aydır ki, ABŞ ilə ticarət razılaşmasına nail olmağa uğursuz cəhd göstərir. Bu arada, polad və alüminiuma tariflər hazırda 50 faizdir.
Ottava rekord ticarət kəsiri fonunda 1 sentyabrda bir sıra Amerika mallarına qarşı bəzi cavab idxal rüsumlarını qaldırdı. Tramp oktyabrda elan edib ki, Vaşinqton Kanada rəsmiləri tərəfindən maliyyələşdirilən və idxal rüsumlarını tənqid edən reklamın yayımlanması səbəbindən Ottava ilə ticarət danışıqlarını bərpa etməyi planlaşdırmır.
Musavat.com
ƏLAQƏLİ XƏBƏRLƏR
XƏBƏR LENTİ
30 Avqust 2026
ŞƏRHLƏRŞƏRH YAZ