Onlayn ictimai-siyasi qəzet
Donald Tramp və Aysel Şükür gündəmi
Trampın Nobel sülh mükafatına iddiasından yazacağım yerdə oxucudan elektron namə gəlir və qolum soyuyur. Qədirbilən və sadiq oxucu yazır ki, hamınız “mejdunarodnik”-politoloq olmuşunuz, ölkənin içindən, öz dərd-sərimizdən yazın.
Oxucu “mejdunarodnik” deyərkən, saytlarda, qəzetlərdə köşə yazısı ilə çıxış edənləri nəzərdə tutur və gerçəkdən də belə bir şey var. Hər gün hamı (bir-iki istisna ilə) Trampdan, Putindən, Zelenskidən, Netanyahudan, Xamneyidən, Paşinyandan, nə bilim, Makrondan, Lukaşenkodan, arada Cinpindən, Kim Çen Indan, Orbandan və başqa bu kimi adamlardan yazır.
Nə edəsən? Gündəmdə onlardır. Dalaşırlar, vuruşurlar, qırışırlar, dartışırlar, dünya da onlara tamaşa edir. İctimaiyyətə süpürləşmə şousu lazımdır. Odey, Esvatininin kralı III Msvati başını aşağı salıb, özünə 16-cı zövcə arayır, heç kəslə də işi yoxdur, nəticədə adı yalnız mənim köşələrimdə çəkilir. Möhtərəmə rəğbətim var, sülhpərvərdir, hətta 12-ci arvadı Ntando Dubenın keçmiş nazir sevgilisi Ndumisa Mambanı türmədən buraxsa, humanist də demək olar.
Xüləs, mətləbdən yayınmayaq, Pakistanın Trampı Nobel sülh mükafatına namizəd göstərməsindən yazmaq istəyirəm. Hələlik alınmır. Çünki oxucu öz ölkəmizin iç işlərinə aid yazı istəyir. Məcburam o mövzuda yazım.
Demək, ölkəmizin daxiində çox ciddi ictimai-siyasi proseslər gedir. Müxalifət partiyaları birləşib koalisiya yaradıblar, növbəti seçklərə blok şəklində qatılmağı müzakirə edirlər, iqtidar komandası isə son rəy sorğusunun nəticələrinə görə 0,5 faizlik reytinq geriləməsindən narahatdır.
Zarafat edirəm, elə şey yoxdur, nə birləşən, blok yaradan var, nə də hansısa reytinq tənəzzülünə görə əndişələnən.
Ölkədə ən ciddi müzakirə olunan mövzu isə 17 yaşı tamam olmayan qızın 37 yaşlı axunda qoşulub qaçmasıdır.
Media “axundun 17 yaşlı qızı qaçırması” yazır, amma qızın özünün utancaq şəkildə yaydığı açıqlamadan hiss olunur ki, ortada qaçırılma söhbəti yoxdur, qoşulub qaçma aktı var.
Sevgili cütlüyün yaşı arasındakı fərqin 20 il olması barədə mülahizələri isə bir zamanlar hit olmuş “Yaşın nə fərqi var ki” mahnısı ilə darmadağın dağıtmaq olar. Yeri gəlmişkən, III Msvatinin XIII arvadı özündən 33 yaş balacadır, amma bu, onların xoşbəxtliyinə mane olmur. Adam çabalayır ki, ildə ən azı bir qızı xoşbəxt eləsin
Tramp da çabalayır, o da dünyada sülh yaratmağa çalışır, Pakistanla Hindistanı durdurub, Rusiya ilə Ukraynanı yola gətirir, İranla İsraili də becərsə, bəlkə də ona Nobel sülh mükafatı verərlər. Bir şərtlə ki, o, gərək Panamaya, Kanadaya, Qrenlandiyaya hücum eləməsin. Norveç Kral Akademiyas tərsdir, başqa ölkəyə hücum edənə sülh mükafatı vermir. (İrandakı Fordoya hücumdan sonra yəqin ki, ser Nobelə ümid etməz).
Ölkəmizin iç işlərindən yazmalıyıqsa, bir aktual mövzu da var. Azı 7 ildir, yazırıq, bitmir. İndi o xüsusda qarşıma çıxan xəbər başlıqlarını iqtibas edirəm, özünüz hesabınızı götürün. Böylədir:
“Adımı çəkməyib, amma mənə deyib” – Aysel Şükürdən keçmiş ərinə sərt ittiham;
“Aysel üçüncü əri ilə FOTOLAR paylaşdı”;
“Aysel yenə ərə getdi: bəyin üzünü göstərdi – VİDEO”;
“Oktay alimentə görə övladlarından imtina etdi” - Aysel Şükür;
“Aysel əməliyyat olundu – VİDEO”;
“Aysel boşandığı birinci əri ilə bir arada”;
“Öz qohumlarımdan yarımayan adamam...” - Aysel Şükür;
“Aysel Şükürə İstanbulda "evlilik təklifi" edildi – VİDEO”;
“Aysel Şükürova dayə axtarır: “Boşanmış, ya da əri ölmüş olsun” – VİDEO”;
"Ağrıdan ölürəm" - Aysel ikinci ərinin hücumu haqda
Təsəvvür edin, adı çəkilən qadın 7 ildir gündəmdədir, nə edir, hara gedir, nə deyir, hamısı xəbərdir. Vaxtilə onun atası “Lifttəmir” istehsalat birliyinin baş direktoru olub. Yeri gəlmişkən, xanım özünə 400 min dollarlıq toy çaldırması ilə heç kəsin tanımadığı atasını necə məşhurlaşdırdısa, kişini işdən çıxardılar.
O vaxtdan bəridir, onun keçmiş ərləri ilə qovğaları medianı başına götürüb. O qadın nə aktrisadır, nə müğənnidir, nə ictimai-siyasi simadır, heç aparıcı və jurnalist də deyil, amma hər gün şəkli, sözü, davaları saytlardadır. Adi bir vətəndaşın həyatı, problemləri nəyə görə ümumxalq diqqətinin predmeti olmalıdır? Mat qalınası işdir.
Salamatı Trampdan yazmaqdır. Həçənd o da tez-tez kimləsə dalaşır, amma Allah qoymasa, sülhə də çalışır. Ona görə də qardaş Pakistan onu sülh mükafatına namizəd göstərib.
Samir SARI 
YAZARIN DİGƏR YAZILARI
22 Iyul 2026
20 Iyul 2026
19 Iyul 2026
17 Iyul 2026
15 Iyul 2026
13 Iyul 2026
11 Iyul 2026
09 Iyul 2026
08 Iyul 2026
06 Iyul 2026
05 Iyul 2026
02 Iyul 2026
30 Iyun 2026
27 Iyun 2026
25 Iyun 2026
23 Iyun 2026
21 Iyun 2026
18 Iyun 2026
16 Iyun 2026
14 Iyun 2026
12 Iyun 2026
10 Iyun 2026
08 Iyun 2026
06 Iyun 2026
04 Iyun 2026
02 Iyun 2026
30 May 2026
22 May 2026
20 May 2026
18 May 2026
ŞƏRHLƏRŞƏRH YAZ