Onlayn ictimai-siyasi qəzet
Rus kilsəsi qardaş qırğınını qızışdırır? – Sülh yox, “qələbə” üçün 12 dua!
Rus Pravoslav Kilsəsi (RPK) Ukraynadakı müharibə ilə bağlı artıq 12 dua təsdiqləyib. Bu mətnlərdə zaman keçdikcə sülh çağırışlarının yerini “Müqəddəs Rus” uğrunda mübarizə, düşmən üzərində qələbə və döyüşən əsgərlərə dəstək motivləri tutub.
Musavat.com xarici agentliklərə istinadən xəbər verir ki, yerli müxalifət mediası RPK-nın 2014-cü ildən indiyədək Ukrayna ilə bağlı istifadə etdiyi dini mətnləri araşdırıb.
İyulun 28-də Rusun xaç suyuna salınması günü patriarx Kirill Müqəddəs Vladimirin abidəsi önündə çıxış edərək müharibə əleyhinə mövqe tutan keşişlərin ölkədən getməsindən məmnun olduğunu bildirib. Onların bir çoxunun kilsə ilə münaqişəsinin səbəbi “Müqəddəs Rus haqqında” məcburi duanı oxumaqdan imtina etmələri olub. Ukrayna üzərində qələbəyə çağırışların yer aldığı bu duanı oxumaqdan imtinanı Kirill xəyanət kimi qiymətləndirib.
Halbuki RPK-nın Ukrayna ilə bağlı ilk duası 2014-cü ildə tamamilə fərqli məzmunda idi. Rusiya həmin dövrdə Ukraynada hərbi qüvvələrinin olduğunu rəsmən inkar edir, patriarx Kirill isə qan tökülməsinin dayandırılmasını və sülhün bərqərar edilməsini istəyirdi.
2022-ci ildən vəziyyət dəyişməyə başlayıb. Fevralın 24-də Kirill yeni dua təklif edib və burada artıq “Müqəddəs Rusa qarşı silahlanan yadellilər” ifadəsi işlədilib.
Rusiyada səfərbərlik elan edildikdən sonra isə patriarx daha bir dua mətni təqdim edib. Bu dəfə müharibədə “qələbənin” zəruriliyi açıq şəkildə vurğulanıb. Həmin dua RPK-nın bütün kilsələrində məcburi elan edilib, onu oxumaqdan imtina edən bəzi din xadimləri isə ruhani rütbəsindən məhrum edilməyə başlayıblar.
2022-ci ilin dekabrında RPK Sinodu daha yeddi hərbi məzmunlu dua təsdiqləyib. Bunlar döyüş meydanındakı hərbçilər, yaralılar, əsir və itkin düşənlər üçün nəzərdə tutulub. Mətnlərin əksəriyyətinin əsgər analarının oxuması üçün ayrıca variantları da hazırlanıb.
Dualardan birində belə deyilir: “Döyüşlərdə onlara cəsarət ver ki, hərbi borclarını qüsursuz yerinə yetirsinlər”.
RPK tərəfindən rəsmən təsdiqlənməsə də, cəbhədə istifadə olunan daha radikal dini mətnlər də var. Onlardan ən məşhurlarından biri “Arxistratiq Putin” haqqında duadır. Bu mətndə Vladimir Putin səmavi ordunun başçısı sayılan arxangel Mixail obrazı ilə müqayisə edilir.
Müharibə ilə birlikdə Stalin dövründən qalan dini mətnlər də yenidən gündəmə gətirilib. RPK ilə əlaqəli “Spas” telekanalında din xadimləri İkinci Dünya müharibəsi illərində Stalin hakimiyyətinə loyal mitropolit Serginin yazdığı “qələbə haqqında” duanı mütəmadi oxuyurlar.
Protoierey Andrey Kordoçkinin sözlərinə görə, “Müqəddəs Rus haqqında” dua faktiki olaraq hərbi təbliğat vasitəsinə çevrilib.
Beləliklə, 2014-cü ildə “qan tökülməsinin dayandırılmasını” istəyən Rusiya kilsəsinin ritorikası müharibənin genişlənməsindən sonra köklü şəkildə dəyişib. Sülh çağırışlarının yerini qələbə, hərbi borc və “Müqəddəs Rus” uğrunda mübarizə ritorikası tutub. Ukrayna və Rusiya xalqlarının etnik, tarixi və dini yaxınlığına baxmayaraq, kilsə rəhbərliyinin hazırkı mətnlərində müharibənin dayandırılması və tərəflərin barışdırılması çağırışları deyil, hərbi qələbə motivləri ön plana çıxır.
Musavat.com
XƏBƏR LENTİ
21 Avqust 2026
20 Avqust 2026
ŞƏRHLƏRŞƏRH YAZ